Sacyjał-demakraty abjadnalisia, vybraŭšy lideram Alaksandra Kazulina.
Jak i pieršaja, druhaja sproba abjadnańnia sacyjał-demakrataŭ pačałasia ŭ Miensku na stancyi Družnaja. Aŭtobus, na jakim delehaty mielisia jechać na miesca źjezdu, nie źjaviŭsia, tamu byŭ dadzieny syhnał jechać na metro, nie pryciahvajučy da siabie zališniaj uvahi. Usia hramada dabrałasia da stancyi metro «Puškinskaja» na zachadzie stalicy, a adtul na 25 taksoŭkach pajechała ŭskładać kvietki da memaryjału ŭ Traściancy. Adtul — u Sieńnicu, viosku na samym uskrajku horadu. Lavon Dziejka, pres-sakratar «Narodnaj hramady», sustrakaŭ žurnalistaŭ, pakazvajučy na svaje zapylenyja čaraviki: «Vo, pahladzicie na boty! Niby Majsiej u pustyni».
U Dom kultury delehataŭ nie puścili — dźviery začynienyja, dyrektar źnik. Tamu źjezd raspačaŭsia litaralna na prystupkach. Pakrysie siabry BSDP (NH) raźmierkavalisia pa ŭsim placy, a delehaty ad BSDH skučkavalisia la pravaha kryła DK. Hety, šosty pa liku, źjezd staŭsia dla partyi apošnim — paśla adchileńnia Stanisłava Šuškieviča ad pasady kiraŭnika BSDH partyja samalikvidavałasia. Sam Šuškievič na źjeździe nie prysutničaŭ i jahonych rašeńniaŭ nie pryznaŭ. «A ciapier usie — na abjadnaŭčy schod!» — zaklikaŭ namieśnik staršyni Alaksiej Karol.
Alaksandar Kazulin, u nieprymietnych kremavych džynsach dy prościeńkaj kurtačcy, to źnikaŭ, to źjaŭlaŭsia, mahnetyzujučy svajoj prysutnaściu sacyjał-demakrataŭ. «Dyk ničoha ž nie adbyvajecca! Ludzi adpačyvajuć!» — pierakonvaŭ jon achoŭnikaŭ paradku, jakija nervova sačyli za natoŭpam. U hety čas lidery abłasnych supołak sprytna prymali zajavy byłych beesdehoŭcaŭ na pierachod u BSDP (NH). Novaja abjadnanaja partyja, utvoranaja paśla pierachodu, budzie mieć nazvu BSDP («Hramada»).
Narešcie, padlikovaja kamisija pačała vydavać biuleteni dla vybaraŭ staršyni. Adzin radok, adno proźvišča, «za» ci «suprać». Niekatoryja abłasnyja lidery jašče nia skončyli atrymlivać biuleteni, a pobač užo raspačałosia hałasavańnie. Delehaty apuskali składzienyja ŭdvaja papiarovyja stužački ŭ vialikuju kardonnuju skryniu z-pad vafelnych tartoŭ.
Poŭny varyjant čytajcie ŭ papiarovaj i pdf-versii hazety "Naša Niva"
Ciapier čytajuć
23‑hadovy achoŭnik z Astraŭca zahinuŭ za Rasiju na vajnie. Pavajavaŭ jon, vidać, kala miesiaca16
Kamientary