Пенсія Станіслава Шушкевіча складае ўжо толькі 37 цэнтаў

Як вядома, А.Лукашэнка ў 1997 годзе адмяніў пастанову парламента аб пажыццёвай пенсіі былым прэм’еру і кіраўніку дзяржавы ў памеры 70–75% ад акладу дзеючых прэм’ера і спікера і падпісаў дэкрэт аб «упарадкаванні пенсій за асаблівыя заслугі перад беларускім народам».

Атрымалася, што пенсіі за асаблівыя заслугі былі прызначаны ў асноўным першым асобам савецкай Беларусі, напрыклад, былым кіраўнікам Кампартыі Беларусі Мікалаю Слюнькову і Яфрэму Сакалову. Пяцярым былым кіраўнікам незалежнай Беларусі — Станіславу Шушкевічу, Георгію Таразевічу, Сямёну Шарэцкаму, Мечыславу Грыбу і Міхаілу Чыгіру — дадзеным дэкрэтам пенсія была пакінута на тым узроўні, на якім знаходзілася на момант падпісання дэкрэта, адным словам, «замарожана». У 1997 годзе гэта было 3 мільёны 196 тысяч беларускіх рублёў, а пасля дэнамінацыі 1999 года стала 3200 рублёў у месяц. Сёння такую пенсію і атрымлівае Станіслаў Шушкевіч. Калі перавесці яе ў долары ЗША, то атрымаецца 37 цэнтаў па курсе Нацбанка.

Трэба адзначыць, што Шушкевіч, які доўгі час сцвярджаў, што прынцыпова не хоча што-небудзь прасіць і прыніжацца, у 2002 годзе ўсё ж такі звярнуўся ў суд, аднак у іску яму было адмоўлена.

У 2010 годзе праз «Народную Волю» Станіслаў Шушкевіч звярнуўся да тагачасных прэм’ер-міністра Беларусі Сяргея Сідорскага, старшыні савета рэспублікі Анатолія Рубінава, старшыні палаты прадстаўнікоў Уладзіміра Андрэйчанкі, кіраўніка Адміністрацыі прэзідэнта Уладзіміра Макея, старшыні Вышэйшага Гаспадарчага суда Беларусі Віктара Камянкова з патрабаваннем аднавіць справядлівасць.

«Відавочна, што дэкрэт, калі ён адпавядае Канстытуцыі, не можа ператвараць пенсію ў насмешку, зрабіць яе менш за мінімальную сацыяльную пенсію, — напісаў Шушкевіч.

Зразумела, што ніхто з чыноўнікаў пенсіяй Шушкевіча займацца не стаў.

Але як можна пражыць на пенсію ў 37 цэнтаў? Можа, Станіслаў Станіслававіч ад яе ўжо адмовіўся?

— Пенсію кожны месяц прыносіць мне дамоў паштальён, па дамоўленасці за яе распісваецца цешча, — кажа Станіслаў Шушкевіч. — Зразумела, што ў цывілізаваным грамадстве такога не бывае, гэта ганьба не толькі Лукашэнку, але і дзяржаве, якая дазваляе падобнае.

Дарэчы, мая пенсiя — гэта паказчык таго, як развiваецца эканомiка Беларусi. Лукашэнка сваім дэкрэтам 1997 года пакінуў пенсію на тым узроўні, на якім яна была ў 1996 годзе, але тады гэта складала 300 долараў, а зараз — 37 цэнтаў! Змарнеў наш рубель больш як у 800 раз. У цывілізаванай краіне любы ўрад, любое кіраўніцтва даўно ўжо вылецела б у трубу…

Што тычыцца мяне, то, дзякуй Богу, здароўе не падводзіць, а зарабіць на жыццё я магу.

***

Ад пенсіі адмовіліся…

Згодна з дэкрэтам А.Лукашэнкі 1997 года з такой мізэрнай пенсіяй — 3 тысячы 200 рублёў — застаўся не адзін Станіслаў Шушкевіч.

На момант падпісання дэкрэта былому прэм’ер-міністру Беларусі Міхаілу Чыгіру яшчэ не споўнілася 60 гадоў, але вось ужо 5 гадоў, як ён мае пенсіённы ўзрост.

— У 1996 годзе, калі я падаў у адстаўку, пачаў атрымліваць гэтую пенсію, — расказвае Міхаіл Чыгір. — Але потым яна абясцэнілася, ператварылася ў нішто. Я ад яе адмовіўся і атрымліваю зараз пенсію па ўзросце. Паколькі я быў дзяржслужачым, пенсія больш-менш неблагая.

Што тычыцца яшчэ трох былых кіраўнікоў Беларусі, то, як вядома, Георгій Таразевіч памёр без пенсіі, Сямён Шарэцкі з’ехаў у замежжа і сёння жыве ў ЗША. Мечыслаў Грыб, як і Міхаіл Чыгір, ад «пенсіі за асаблівыя заслугі» адмовіўся і атрымлівае пенсію ваеннаслужачага. Грыб — генерал-лейтэнант міліцыі.

• 0
• 0
• 0
• 0
• 0
• 0
• 0
• 0