Беларуская партыя «Зялёныя» гатовая выплаціць штраф замест арганізатара велапрабегу стыляг у Мінску Ірыны Бійнік.
Як раней паведамлялася, Ірына Бійнік па рашэнні суда аштрафавана на 2 мільёны рублёў за арганізацыю 17 жніўня ў цэнтры сталіцы «Стыляжнай пакатушкі». Велапрабег у рэтрастылі шырока асвятляўся СМІ.
Яго ўдзельнікі-стылягі стартавалі на плошчы Незалежнасці і рушылі да вуліцы Карла Маркса, якая ў выхадныя дні з’яўляецца пешаходнай. Там стылягі наладзілі танцы.
Далей велапрабег прайшоў па праспекце Незалежнасці і фінішаваў каля Нацыянальнай бібліятэкі.
Пратакол аб парушэнні заканадаўства быў складзены на арганізатара «Стыляжнай пакатушкі» 28 жніўня.
Ірыну Бійнік абвінавацілі ў парушэнні закона аб масавых мерапрыемствах (правядзенне несанкцыянаванай акцыі).