Рабаванне адбылося яшчэ 19 верасьня, але вядома пра яго стала толькі цяпер, калі міліцыі ўдалося затрымаць банду налётчыкаў.
Паводле менскай міліцыі, рабаўнікі прадставіліся работнікамі ЖЭС і ўвайшлі ў кватэру Аляксандра Шакуціна па вуліцы Кузьмы Чорнага. Пасля гэтага адзін з рабаўнікоў дастаў пісталет.
Яны звязалі ўсіх, хто знаходзіўся ў кватэры, пасля чаго вынеслі з яе 7 тысяч даляраў, 800 індыйскіх рупій і ювелірныя вырабы (пярсцёнкі з дыяментамі, залатыя зашпілкі і срэбныя ўпрыгажэнні). ЖЭСаўскую ўніформу яны выкінулі ў лесе, а таксама ў смеццевым кантэйнеры адной з вёсак Мінскага раёна.
Як выявілася, разбойны напад учынілі трое 28-гадовых мінчукоў, двое з якіх нідзе не працавалі. У дачыненні да іх заведзеная крымінальная справа.
28- гадовы Аляксандр Шакуцін — сын вядомага ў Беларусі мультымільянера Аляксандра Шакуціна, які займае 2-е месца ў Топ-200 уплывовых бізнэсоўцаў Беларусі. Сын узначальвае прадзюсарскае агенцтва ТАА «Спамаш-груп», якое ўваходзіць у групу кампаній бацькі.
