Кітай наймае заходніх тыктокераў за сотні тысяч даляраў для паляпшэння свайго іміджу перад Алімпіядай
Армія уплывовых заходніх блогераў, у кожнага з якіх сотні тысяч падпісчыкаў у TikTok, Instagram або Twitch, будзе распаўсюджваць пазітыўныя гісторыі пра Кітаі падчас зімовых Алімпійскіх гульняў у наступным месяцы.
Занепакоены негатыўнай рэакцыяй свету на Пекінскія гульні на фоне хвалі дыпламатычных байкотаў, урад Кітая наняў заходніх спецыялістаў па сувязях з грамадскасцю для стварэння і распаўсюджвання альтэрнатыўнага вобразу краіны праз сацыяльныя сеткі, піша The Guardian.
У лістападзе, калі Джо Байдэн абдумваў дыпламатычны байкот, Віпіндэр Джасвал, амерыканскі журналіст Newsweek і былы выканаўчы дырэктар Fox News і HSBC, падпісаў кантракт на 300 000 даляраў з Генеральным консульствам Кітая ў Нью-Ёрку на «распрацоўку стратэгіі і правядзенне» кампаніі ўплыву, якая будзе прасоўваць у Штатах зімовыя Алімпійскія і Паралімпійскія гульні ў Пекіне.
У кантракце, які быў зарэгістраваны ў Міністэрстве юстыцыі ЗША, выкладзена падрабязная стратэгія рэкламнай кампаніі. Паводле пагаднення, у перыяд з 22 лістапада па 13 сакавіка, калі скончацца зімовыя Паралімпійскія гульні, кожнаму блогеру трэба падрыхтаваць ад трох да пяці пастоў, распрацаваных з улікам мэтавай аўдыторыі. Джасвал сцвярджае, што яго кампанія атрымала да 50 прапаноў ад інфлюэнсераў — ад былых алімпійцаў да прадпрымальнікаў.
У кантракце гаворыцца, што 70% кантэнту будзе звязана з культурай: гісторыяй Пекіна, культурнымі рэліквіямі, сучасным жыццём людзей і новымі тэндэнцыямі. Яшчэ 20% будуць падкрэсліваць «супрацоўніцтва і любыя добрыя рэчы ў кітайска-амерыканскіх адносінах», у тым ліку двухбаковыя змены на высокім узроўні і станоўчыя вынікі.
Джасвал, які нарадзіўся ў Вялікабрытаніі, атрымаў 210 000 даляраў неўзабаве пасля таго, як кантракт быў заключаны з кітайскімі дыпламатамі, паведаміў ён The Observer. Ён паабяцаў Пекіну, што яго блогеры прынясуць прыкладна 3 мільёны паказаў у сацыяльных сетках, якія часта выкарыстоўваюцца маладымі амерыканцамі.
Пры гэтым журналіст пацвердзіў, што ён у курсе пытанняў, якія выклікае палітыка Кітая ў Сіньцзяне і Ганконгу, але «тое, што мы спрабуем зрабіць, — гэта проста падкрэсліць сумленнасць і годнасць Алімпійскіх гульняў», — сказаў ён. «Байкоты не спрыяюць паразуменню… Я не падтрымліваю байкотаў. Яны неэфектыўныя, недарэчныя і неістотныя».
Пекінскі кантракт Джасвала выклікаў крытыку ў ЗША. Сенатар-рэспубліканец Рык Скот у лісце кіраўніцтву Newsweek заклікаў «перагледзець свае стасункі з Віпам Джасвалам».
У мінулым месяцы Байдэн абвясціў, што яго адміністрацыя зладзіць дыпламатычны байкот зімовых Алімпійскіх гульняў у знак нязгоды з тым, як кітайскі ўрад абыходзіцца з людзьмі ў Сіньцзян-Уйгурскім рэгіёне. Некалькі саюзнікаў ЗША, уключаючы Вялікабрытанію і Аўстралію, далучыліся да заклікаў не пасылаць сваіх чыноўнікаў у Кітай.
У сваю чаргу кітайскі ўрад адмаўляе абвінавачанні ў парушэннях правоў чалавека на сваёй тэрыторыі.
Кітай — таталітарная дыктатура, уся ўлада ў краіне належыць Камуністычнай партыі, людзі не выбіраюць улады свабодна.
Каментары