Супрацоўніка радыёстанцыі «Гомель» Кругляка ў суботу асудзілі да года калоніі
Суд Цэнтральнага раёна Гомеля прыгаварыў вядучага радыёстанцыі «Гомель» Аляксея Кругляка (Каверына) да 1 года калоніі па абвінавачванні ў грубым парушэнні парадку (артыкул 342 КК) за паведамленні аб пратэстах у закрытым чаце, паведамляе праваабарончы цэнтр «Вясна»
Аляксея Кругляка затрымалі 2 снежня 2021 года і да суда ўтрымлівалі ў СІЗА №3 Гомеля.
Паводле абвінавачання, Аляксей, знаходзячыся на працоўным месцы на Гомельскім тэлебачанні, са свайго тэлефона ў прафесійным закрытым чаце 12 жніўня 2020 года напісаў некалькі паведамленняў, якія тычацца палітычнай сітуацыі ў краіне пасля выбараў. Ён убачыў, які гвалт і агрэсія былі ў Мінску і іншых гарадах краіны над мірнымі жыхарамі, якія выказвалі сваё стаўленне да выбараў.
На эмоцыях Аляксей прапанаваў выходзіць на вуліцы ў Гомелі, ладзіць маршы, станавіцца ў ланцугі. Сам гатовы быў удзельнічаць у любых актыўных дзеяннях, нават надзець белую вопратку і далучыцца да жанчын з кветкамі, калі будзе неабходна, то і ў сукенку.
Гэтыя паведамленні расцанілі як заклікі да несанкцыянаваных мітынгаў і дзеянняў, якія груба парушаюць грамадскі парадак, а яго палічылі арганізатарам гэтых дзеянняў.
Крымінальную справу завялі толькі праз год, восенню 2021-га, калі хтосьці з гэтага закрытага чата зліў інфармацыю ў праўладны чат «Жоўтыя злівы».
Аляксей да таго часу пра гэтыя паведамленні забыўся. Пасля апублікавання ён запісаў і выклаў у інтэрнэт «пакаяннае» відэа, дзе ад усяго адхрышчваўся ў надзеі, што яго не затрымаюць.
На пачатку следства Кругляк сваю віну прызнаваў часткова: прызнаваў, што пісаў ён, але нікуды, нікога не заклікаў, а «проста хацеў выйсці прагуляцца ў кампаніі і паглядзець абстаноўку ў горадзе».
А на судовым працэсе Кругляк цалкам прызнаў віну.
У сваім апошнім слове Аляксей, паведамляе «Вясна», «добра пастаўленым дыктарскім голасам агучыў, што згодны на ўсё, нават стаць «рупарам прапаганды», працаваць не пакладаючы рук на карысць краіны і рэжыму, абы не адпраўлялі ў калонію, а адпусцілі дадому да сям'і».
Суддзя Віктар Казачок прызначыў Кругляку пакаранне ў выглядзе пазбаўлення волі тэрмінам на адзін год у калоніі агульнага рэжыму, за выняткам часу праведзенага пад следствам у СІЗА.
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы1919
Каментары