«Замучылі праверкамі». Прадпрымальнікі спынілі працу ў 13 гарадах краіны
Сёння ў знак пратэсту супраць рэгулявання цэн не адкрылі свае крамы прадпрымальнікі мінімум у 13 гарадах краіны, паведамляе Motolko.help. Сярод іх Мінск, Гродна, Баранавічы. Са слоў прадпрымальнікаў, асноўная прычына, чаму яны сёння не адкрыліся — немагчымасць працаваць згодна з новай пастановай аб рэгуляванні коштаў.
На рынку «Універсальны» з раніцы былі зачыненыя ўсе ралеты. Прадпрымальнікі тапталіся побач са сваімі павільёнамі, але ніхто іх нават не адчыняў, паведамляе Intex-press.by.
— Не будзем гандляваць да выхадных дакладна, — патлумачыла адна жанчына-прадпрымальнік. — А сэнс цяпер працаваць, толькі сабе ў страту! Пры такім цэнаўтварэнні заплаціш падаткі, арэнду, заробак прадаўцу, за месца на рынку — і ўсё, пойдзеш у мінус.
Адзін мужчына тлумачыць, што ўведзеныя абмежаванні на надбаўку не вышэй за 30% робяць іх бізнэс не выгадным.
— Заплаці 10% на падаткі, 10% на арэнду — і нічога сабе не застаецца, — дадае дзяўчына. — З дапушчальнымі надбаўкамі гэтымі таксама незразумела. На дзіцячы абутак яна 30%, на дарослы 50%, а закупка на абутак аднолькавая, вось і атрымліваецца, што будзем працаваць сабе ў страту.
— Замучылі цяпер праверкамі! — уздыхае адзін прадпрымальнік. — Патрабуюць дакументы на тавар ледзь не са дня адкрыцця майго бізнэсу, а дзе іх цяпер ўзяць, я ж не захоўваю іх дзесяцігоддзямі.
Паведамляецца таксама, што не працуюць прадпрымальнікі ў Лідзе, Маладзечне, Магілёве, Віцебску і Гомелі.
Сёння па ўсім горадзе зачыненыя гандлёвыя павільёны прадстаўнікоў прадпрымальніцтва. Яны абвясцілі, што ставяць сваю дзейнасць на паўзу да тых часоў, пакуль не атрымаюць выразнага тлумачэння, як далей прымяняць механізм цэнаўтварэння, паведаміла мясцовае выданне «Наш край».
На мінулым тыдні пастановай урада было ўведзена рэгуляванне цэн як на айчынныя, так і на імпартныя тавары. Аднак 27 кастрычніка Саўмін скарэктаваў асобныя нормы пастановы № 713. У прыватнасці ўдакладнены парадак правядзення пераацэнкі і даацэнкі рэшткаў спажывецкіх тавараў імпарцёрамі і суб'ектамі аптовага і рознічнага гандлю. Усталяваны парадак аднясення выдаткаў імпарцёраў і суб'ектаў аптовага і рознічнага гандлю па фасоўцы спажывецкіх тавараў.
Акрамя таго, канкрэтызаваны асобныя таварныя пазіцыі, у дачыненні да якіх ажыццяўляецца дзяржаўнае рэгуляванне цэн.
Цяпер чытаюць
Анжаліка Мельнікава пасля знікнення набыла дзве кватэры ў Мінску67
Каментары