Янчэўскі стварае ў Эміратах фінансавую пракладку для рэзідэнтаў ПВТ
Як стала вядома «Нашай Ніве», адміністрацыя Парка высокіх тэхналогій у гэтыя тыдні рэгіструе юрыдычную асобу ў Аб'яднаных Арабскіх Эміратах. Цераз яе збіраюцца пераводзіць грошы тых беларускіх ІТ-кампаній і замежных замоўцаў, якія не могуць працаваць наўпрост з Беларуссю пасля пачатку поўнамаштабнай вайны ва Украіне.
«Работа вядзецца і хутка будзе скончаная», — паведаміў «Нашай Ніве» абазнаны суразмоўца, каментуючы ход адкрыцця юрыдычнай пракладкі ПВТ у ААЭ.
Пасля адкрыцця юрыдычнай асобы для яе будуць адкрытыя валютныя рахункі ў банках ААЭ.
Для чаго гэта робіцца?
Ідэя адкрыцця кампаніі ў ААЭ належыць кіраўніцтву Парка высокіх тэхналогій. Узначальвае ПВТ Усевалад Янчэўскі.
З аднаго боку, патрэба вынікае з сітуацыі на рынках: праз ускладненні фінансавых стасункаў паміж беларускімі банкамі і банкамі развітых краін узнікаюць цяжкасці ў аплаце паслуг тых беларускіх кампаній, якія па сваіх прычынах застаюцца ў Беларусі, працуючы пры гэтым на заходнія рынкі.
Стварыўшы юрыдычную асобу ў Эміратах, кіраўніцтва ПВТ спадзяецца такім чынам вырашыць праблему падобных кампаній. Плануецца, што заходні замоўца будзе плаціць не ў такую таксічную юрысдыкцыю, якой цяпер лічыцца беларуская, а на рахункі пракладкі ПВТ у ААЭ. А ўжо потым гэтыя грошы будуць трапляць у Беларусь. Імаверна, у валюце, адрознай ад валюты прыходу. Напрыклад, канвертаваныя ў юані.
ПВТ будзе мець з гэтага свой працэнт за абслугоўванне.
Колькі кампаній патэнцыйна змогуць карыстацца паслугай пракладкі? Адказ не відавочны.
Як тлумачаць удзельнікі рынку, праблема, якую спрабуе вырашыць Янчэўскі, узнікла не ўчора, і пераважная большасць мэтавай аўдыторыі ўжо паспела знайсці варыянты работы, паадкрываўшы офісы і рахункі ў тых юрысдыкцыях, куды атрымліваюць грошы ад замоўцаў, а потым, хаця і не без цяжкасцяў, выводзяць грошы ў Беларусь.
У айцішных колах называюць дзеянні запозненымі, але таксама бачаць і магчымае двайное дно.
«Усе нармальныя людзі ўжо даўно разабраліся з тым, як атрымліваць грошы кудысьці ў іншае месца, а потым пераводзіць іх у Беларусь. А калі нехта не разабраўся, то заўсёды прасцей папрасіць аб пасярэдніцтве сваіх знаёмых, чым дзяржаву.
Таму ў гэтай ідэі можна бачыць або ўжо нясвоечасовую спробу дапамагчы, або задумку з іншымі матывамі.
Ад нашай дзяржавы нельга чакаць нічога добрага, і я чуў перасцярогі, што загон у гэтую пракладку будзе адбывацца прымусова, таму што лукашысты ўвесь час падазраюць ІТ-кампаніі ў тым, што частку прыбытку яны пакідаюць за мяжой, даводзячы да радзімы не сапраўды заробленыя сумы, а толькі тыя, якія лічаць неабходным паказаць.
Адпаведна, жаданне ўбачыць рэальныя памеры фінансавых плыняў асобных гульцоў — яшчэ адно магчымае прымяненне пракладкі. Можна будзе экстрапаляваць гэтыя даныя на іншыя кампаніі і спытаць у іх: «А дзе грошы?» — лічыць адзін з кіраўнікоў вялікай ІТ-кампаніі.
Цікава было б у гэтай гісторыі разумець і матывацыю арабаў, якія даюць хаб для краіны, супраць банкаў якой дзейнічаюць санкцыі.
«На гэты конт пакуль што можна толькі спекуляваць. Наўрад ці працэнты на абслугоўванні беларускай айцішкі — гэта тыя грошы, якія ў прынцыпе заўважыць фінансавы сектар ААЭ. Але ёсць і іншыя інтарасанты. Адзін з пунктаў КРІ профільных чыноўнікаў у ААЭ — гэта прывод, арганізацыя работы ў краіне высокатэхналагічнага бізнэсу. У гэтым сэнсе, я думаю, з адміністрацыйнага боку існуе поўная падтрымка.
А калі казаць пра інтарэсы бізнэсу, то, атрымаўшы інфармацыю пра фінансавы стан кампаній беларускай айцішкі, арабы будуць мець разуменне, што з гэтага рабочае. І ўжо на падставе гэтай інфармацыі можна будзе прыкідваць, якую кампанію можна выкупіць, у якую зайсці капіталам — словам, на чым можна зарабіць. Пакуль што гэтага разумення ў арабаў няма, а атрымаюць яны яго, лічы, задарма», — разважае яшчэ адзін інфармаваны суразмоўца.
Рэстаўрацыі ў Беларусі засталося на тры дні. Галоўнаму прадпрыемству краіны фактычна падпісалі смяротны прысуд1
Каментары