«Удар у спіну». Пуцін выступіў са зваротам да вайскоўцаў і насельніцтва
Відэазварот прэзідэнта Расіі Уладзіміра Пуціна паказалі ў эфіры «Першага канала». Гэта адбылося на фоне «мяцяжа Прыгожына» і прыходу сіл ПВК «Вагнер» у Растоў.
«Расія вядзе цяжкую барацьбу за сваю будучыню», — сказаў Пуцін.
Ён заклікаў усіх згуртавацца: «Гэта бітва, калі вырашаецца лёс нашага народа, патрабуе адзінства ўсіх нашых сіл».
Пуцін параўнаў гэты выступ з падзеямі 1917 года. «Піхаюць краіну да анархіі і капітуляцыі», — сказаў ён.
Мяцеж Прыгожына Пуцін назваў «адступніцтвам», «ударам у спіну», «здрадай».
«Непамерныя амбіцыі і асабістыя інтарэсы прывялі да здрады», — заявіў прэзідэнт Расіі.
Ён дадаў, што дзеянні рэжыму ў адказ будуць жорсткія і што асобы, датычныя да мяцяжу, будуць пакараныя, бо «Узброеныя сілы і іншыя дзяржаўныя органы атрымалі загады».
«Сітуацыя ў Растове-на-Доне застаецца складанай», — сказаў Пуцін пра Растоў, які захапілі вагнераўцы.
Ëн заклікаў «не рабіць фатальную, трагічную памылку. Зрабіць адзіны правільны выбар: спыніць удзел у злачынных дзеяннях».
«Пераадолеем любыя выпрабаванні, станем яшчэ мацнейшымі», — сказаў Пуцін у канцы звароту, які доўжыўся пяць хвілін.
Учора ўвечары, 23 чэрвеня, кіраўнік ПВК «Вагнер» Яўген Прыгожын серыяй сваіх пастоў у тэлеграме абвясціў пра пачатак адкрытага ваеннага супрацьстаяння з вайсковымі часцямі, вернымі расійскаму Мінаабароны.
24 чэрвеня вагнераўцы былі ў Растове. У 7 гадзін 30 хвілін раніцы Прыгожын паведаміў, што вагнераўцы захапілі штаб Паўднёвай вайсковай акругі і што расійскія самалёты працягваюць бамбіць украінцаў.
Таксама Прыгожын паведаміў, што цалкам кантралюе Растоў, заблакаваны ўсе вайсковыя аб’екты і захоплены аэрадром.
Публікаваліся кадры, дзе ён вядзе перамовы з намеснікам міністра абароны Юнус-Бекам Яўкуравым.
«Мы сюды прыехалі. Мы хочам атрымаць начальніка Генштаба і Шайгу. Пакуль іх няма, мы знаходзімся тут, блакуем горад Растоў і ідзём у Маскву», — кажа Прыгожын на відэа.
Падрабязней пра храналогію падзей чытайце тут:
Прыгожын у Растове. Што вядома на гэты момант пра «мяцеж Прыгожына»
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень10
Каментары