«О божа, гэта нядобра!» Маск расказаў пра «цудоўную размову» з Пуціным
Амерыканскі бізнэсовец, уладальнік Tesla, SpaceX і сацсеткі X (былая Twitter) Ілан Маск восенню мінулага года паведаміў прадстаўнікам Пентагона, што меў размовы з Уладзімірам Пуціным, абмеркаваўшы з ім сітуацыю ва Украіне, паведамляе РБК са спасылкай на The New Yorker.
Адна з крыніц выдання ў Мінабароны ЗША распавяла, што пры абмеркаванні з амерыканскімі чыноўнікамі выкарыстання тэрміналаў Starlink ва Украіне ў кастрычніку мінулага года Маск згадаў пра размову з Пуціным. «Ён сказаў: «Што ж, у мяне была выдатная размова з Пуціным». І мы падумалі: «О божа, гэта нядобра», — адзначыў высокапастаўлены чыноўнік з Пентагона.
Са слоў іншага суразмоўцы газеты, Маск заявіў, што асабіста размаўляў з Пуціным за некалькі тыдняў да таго, як апублікаваў у твітары свой варыянт мірнага плана, і дадаў, што яго кансультацыі з Крамлём былі рэгулярнымі.
Пра тое, што перад публікацыяй свайго мірнага плана Маск меў размову з Пуціным, у кастрычніку мінулага года пісаў Vice са спасылкай на эканаміста Яна Брэмера.
Сам бізнэсовец зняпраўдзіў гэтую інфармацыю. «Гэта няпраўда. Я размаўляў з Пуціным толькі аднойчы, і гэта было каля 18 месяцаў таму. Тэмай быў космас», — паведаміў ён у Twitter, каментуючы публікацыю Vice.
У пачатку кастрычніка мінулага года Маск апублікаваў у Twitter апытанне, дзе прапанаваў прагаласаваць за або супраць свайго бачання мірнага ўрэгулявання канфлікту ва Украіне. У прыватнасці, ён выказаў здагадку, што канфлікт скончыцца тым, што Крым застанецца часткай Расіі, а ў занятых расійскімі войскамі рэгіёнах паўторна пройдуць рэферэндумы пад наглядам ААН. Акрамя таго, паводле яго слоў, мірнае пагадненне можа прадугледжваць, што Украіна застанецца нейтральнай краінай, а бакі дамовяцца аб водазабеспячэнні Крыма.
Маск таксама заявіў, што ў выпадку «татальнай вайны» з Расіяй перамога Украіны будзе малаімавернай. На думку Маска, вынікі рэферэндумаў у «ДНР», «ЛНР», акупаваных частках Запарожскай і Херсонскай абласцей звязаныя з тым, што «ў некаторых усходніх рэгіёнах краіны большасць насельніцтва складаюць расіяне і яны аддаюць перавагу Расіі».
Кіеў негатыўна адрэагаваў на публікацыі бізнэсмена.
Цяпер чытаюць
«Яна гадамі цярпела, а пасля адзін раз ударыла мужа нажом — гэтага хапіла, каб забіць»14
Каментары