Палата прадстаўнікоў ЗША ў аўторак прагаласавала за адхіленне спікера Кевіна Макарці ад займанай пасады. За ініцыятыву выказаліся 216 кангрэсменаў, 210 — выступілі супраць, піша «Радыё Свабода».
Пастанова прынятая на фоне спрэчак паміж калегамі Макарці ў Рэспубліканскай партыі, якую ён таксама прадстаўляе. Спрэчкі прывялі да далейшага хаосу ў Кангрэсе ўсяго праз некалькі дзён пасля таго, як парламенту ледзь удалося ўзгадніць часовы бюджэт і прадухіліць спыненне працы федэральнага ўрада.
Галасаванне 3 кастрычніка адзначыла першы выпадак у гісторыі Злучаных Штатаў, калі Палата прадстаўнікоў адхіліла свайго лідара з ініцыятывы адносна невялікай групы правых рэспубліканцаў пад кіраўніцтвам кангрэсмена Мэта Гетца ад штата Фларыда. Ён абвінаваціў лідара большасці ў палаце ў тым, што той не распачаў дастатковых намаганняў для скарачэння федэральных выдаткаў.
Падчас дэбатаў перад галасаваннем па рэзалюцыі Гетц і некалькі яго саюзнікаў раскрытыкавалі Макарці за тое, што ён спадзяваўся на дэмакратаў пры прыняцці законапраекта па часовым фінансаванні.
«Нам патрэбны спікер, які будзе змагацца за нешта — за што заўгодна — акрамя таго, каб заставацца спікерам», — сказаў прадстаўнік рэспубліканцаў Боб Гуд.
Прыхільнікі Макарці, у тым ліку і некаторыя з тых, каго адносяць да кансерватыўнага крыла, настойвалі, што спікер паспяхова абмежаваў выдаткі і прасоўваў іншыя важныя для партыі прыярытэты. Гэтыя дасягненні могуць апынуцца пад пагрозай, папярэджвалі абаронцы Макарці.
Часовым спікерам Палаты прадстаўнікоў ЗША абраны кангрэсмен-рэспубліканец ад штата Паўночная Караліна Патрык Макгенры, найбліжэйшы паплечнік адхіленага спікера, паведамляе CNN. Яго прызначэнне на пасаду часовага спікера было падтрымана прадстаўнікамі абедзвюх партый у Кангрэсе ЗША. Кандыдатура Макгенры была прапанаваная Кевінам Макарці.
Выйшаў на свабоду 76-гадовы Сямён Добкін, брат заснавальніка EPAM7
Выйшаў на свабоду 76-гадовы Сямён Добкін, брат заснавальніка EPAM
«На працягу 30 гадоў незалежнасці беларускамоўныя бюлетэні задавальнялі ўсіх». Камуністы абвінавацілі Бондараву ў распальванні варожасці на моўнай глебе1414
Каментары
При этом Дональд Трамп поддержал МакКарти. Как бы повод задуматься.