У Беларусі прапаноўваюць чыпіраваць усіх сабак і катоў

Уласнікі сабак і катоў у Беларусі будуць абавязаныя чыпіраваць сваіх гадаванцаў цягам 14 дзён з дня іх набыцця, гаворыцца ў апублікаваным законапраекце «Аб адказным абыходжанні з жывёламі».

Пры гэтым чыпіраванне чатырохногіх, зарэгістраваных да прыняцця закона, будзе добраахвотнай справай гаспадара. Калі ж сабака або кот не былі зарэгістраваныя, то іх прыйдзецца ў абавязковым парадку зарэгістраваць на працягу трох гадоў пасля ўступлення закона ў сілу, піша «Спутнік».

У артыкуле 29 законапраекта гаворыцца аб чыпіраванні не толькі дарослых жывёл, але таксама кацянят і шчанюкоў.

«Уладальнікі гадавальнікаў і заводчыкі, якія маюць нерэалізаваны прыплод, павінны чыпіраваць прыплод на працягу чатырнаццаці дзён з моманту дасягнення прыплодам чатырохмесячнага ўзросту», — сказана ў праекце закона.

Больш дэталёвы парадак чыпіравання катоў і сабак прапіша ўрад.

Акрамя чыпіравання ў законе закрануты многія іншыя аспекты ўтрымання хатніх жывёл. Напрыклад, у жывёлы павінна быць рэгістрацыя.

«Рэгістрацыі падлягаюць сабакі, у тым ліку паляўнічыя, каты ў хатніх умовах, а таксама дзікія жывёлы, якія знаходзяцца ў няволі», — абвяшчае артыкул 22.

Калі кот або сабака ўтрымліваюцца дома, то іх рэгістрацыяй займаюцца мясцовыя ўлады. На кожную жывёлу выдадуць пасведчанне і жэтон. Апошні павінен быць пастаянна прымацаваны да нашыйніка, калі гадаванец знаходзіцца «па-за межамі месца яго пастаяннага знаходжання».

Калі сабака альбо кот загінулі або памерлі, або іх «усыпілі», на працягу 10 дзён гаспадар абавязаны паведаміць арганізацыі-рэгістратару па месцы жыхарства. Аб пераездах таксама прыйдзецца паведамляць, і ў такі ж тэрмін, — пасля прыбыцця.

Таксама будуць уведзеныя асаблівыя патрабаванні, калі прымуць закон, да перавозкі жывёл.

П'янаму гаспадару, згодна з законапраектам, будзе забаронена выгульваць чацвераногага сябра. Акрамя таго, уваход на дзіцячыя пляцоўкі з катамі і сабакамі будзе закрыты. Свабодны выгул у населеным пункце будзе магчымы ў спецыяльна адведзеных месцах.

Гэты праект закона ў Палату прадстаўнікоў унесла дэпутатка Марыя Васілевіч. Такі дакумент яна анансавала неўзабаве пасля яе абрання ў Палату прадстаўнікоў у 2019 годзе.

Аналагічны дакумент разглядаўся ў ніжняй палаце беларускага парламента больш за дзясятак гадоў таму. У ім таксама была норма аб абавязковым чыпіраванні. Але дакумент тады адклікалі, палічыўшы, што грамадства не гатовае.

• 5
• 0
• 3
• 4
• 1
• 0
• 3
• 0