Раёнка зладзіла рэйд па сельскіх крамах і ледзь знайшла мандарыны
Раённая газета «Хойніцкія навіны» вырашыла праехацца па сельскіх крамах і паглядзець, што там можна купіць да навагодняга стала. Высновы несуцяшальныя.
Журналістка раёнкі наведала 5 крам — дзяржаўныя і прыватныя.
Спачатку зазірнула ў прыватную краму ў Стралічава. Здзівіў добры выбар каўбас і вэнджаніны. Гарошку некалькі відаў, агуркі з памідорамі ёсць на прылаўках. Праўда, цэны трохі кусаюцца. Кілаграм памідораў абыдзецца ў 11,50 рубля. А вось стронгі журналістка не знайшла, ды і галоўнага навагодняга фрукта — мандарынаў — не было. Але прадавец запэўніла, што днямі абавязкова падвязуць.
Далей паехалі ў Храпкоў. Раёнка прызнаецца, што і не разлічвала на шырокі асартымент Брагінскага райспажыўтаварыства. Але інгрэдыенты для любімых салат усё ж такі там ёсць: кукуруза, шампіньёны, ананасы (бляшанка — 5,27 рубля). За бутэльку шампанскага прыйдзецца выкласці 9,46 рубля.
«Дарагавата, але раскупляюць», — падмячае журналістка.
У аграгарадку Судкова мандарынаў пакуль не прадаюць. Затое ёсць селядзец са шпротамі, крабавыя палачкі, зноў жа гарошак. Шакаладных цукерак шмат. Тартоў няма, але ўжо замовілі.
У Барысаўшчыне пахваліцца выбарам прадуктаў дзяржаўная крама не зможа.
«Бедненька на прылаўках — гародніны няма, садавіны мала. Адзінае — ёсць шампіньёны, кукуруза, ананасы. І намі любімы гарошак», — апісвае раёнка.
Затое прыватная крама ў аграгарадку Глінішча парадавала. Там знайшлі і чырвоную рыбу (200 г — 14,85 руб.) і мандарыны (1 кг — 7,50 руб.).
«Мяркуючы па нашым параўнальным аналізе, можна зрабіць выснову, што крамы райспажыўтаварыства ў раёне не змогуць цалкам забяспечыць патрэбы людзей у прадуктах да навагодняга застолля. А вось камерцыйныя — практычна», — падсумавала раёнка.
-
«Над галавой лятае па 20 тон». Брат і сястра з Беларусі расказалі, колькі зарабляюць у порце польскай Гдыні
-
«Многія людзі стануць непатрэбнымі». Сузаснавальнік EPAM пра сяброўства з Добкіным, багацце і няроўнасць, жыццё ў Латвіі і настальгію
-
У ліпені Расія яшчэ больш павялічыла закупкі паліва ў Беларусі
Цяпер чытаюць
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе1010
Каментары