Ад паказаў Victoria’s Secret і вокладак Vogue да здымак у Сафіі Копалы. Беларускія мадэлі, якія скарылі сусветныя подыумы
Многія лічаць, што дзяўчаты з Беларусі — адныя з самых прыгожых у свеце. Беларускія мадэлі ўсё часцей заваёўваюць сусветныя подыумы, становяцца тварамі самых прэстыжных дамоў моды і падпісваюць уражвальныя кантракты. Пра самых вядомых з іх расказала Palatno.
Кацярына Даманькова — супермадэль свету і анёл Victoria’s Secret
Кацярына Даманькова — дзяўчына, пра якую ў 2006 годзе ў Беларусі было чуваць з кожнага праса. Менавіта тады яна выйграла прэстыжны конкурс «Супермадэль свету» і стала сапраўднай зоркай.
Каця нарадзілася ў 1988 годзе ў Мінску. Вучылася дзяўчынка ў політэхнічнай гімназіі і марыла стаць не мадэллю, а генным інжынерам.
Усё змяніла выпадковая сустрэча ў кавярні з Сяргеем Нагорным, заснавальнікам самай вядомай у Беларусі мадэльнай школы. Той параіў дзяўчыне паспрабаваць сябе на кастынгах, запрасіў у сваё агенцтва і зрабіў прафесійнае партфоліа. Так Каця атрымала свой першы кантракт і стала тварам папулярнага тады мабільнага аператара DIALLOG.
Неўзабаве пасля гэтага прыйшла першая замежная прапанова працы, і дзяўчына паляцела ў Лондан, а потым у Парыж.
Вызначальным момантам у кар’еры беларускі стаў конкурс Supermodel of the World амерыканскага агенцтва Ford. Дзяўчына ехала ў Нью-Ёрк толькі з адной мэтай — перамагчы. На самім шоу перад фінальным выхадам было шмат нерваў, прычоску Каці мянялі ажно тры разы.
Падчас абвяшчэння тройкі фіналістаў у галаве ўдзельніцы была адна думка — толькі не другое месца. «Другое для мяне было б самым крыўдным пройгрышам, самым балючым з магчымых сцэнарыяў», — скажа пазней дзяўчына ў інтэрв’ю. Але яе аб’яўляюць пераможцай, і ўжо праз паўгадзіны Каця тэлефануе бацькам у Беларусь і крычыць у слухаўку: «Я выйграла, мама! Я перамагла!» У тую ноч бацькі больш не заснулі, а ўвесь наступны дзень давалі інтэрв’ю на галоўных каналах краіны.
Дзякуючы Даманьковай і яе перамозе, агенцтва Сяргея Нагорнага атрымае прызнанне за мяжой і стане галоўным «пастаўшчыком» беларускіх мадэляў на подыумы Нью-Ёрка, Мілана і Парыжа.
Пасля выйгрышу Каця зразумела, што ёй трэба будзе надоўга пераехаць у Амерыку і будаваць кар’еру. Было вельмі страшна. Дзяўчына некалькі гадоў жыла з сяброўкамі ў невялікай здымнай кватэрцы, бясконца ездзіла на кастынгі і стаяла ў чэргах у чаканні, што яе выберуць. Усё ішло нядрэнна, Даманькова супрацоўнічала з вядомымі брэндамі (Armani, Calvin Klein, Oscar de la Renta, Carolina Herrera), здымалася для глянцу (Marie Claire і Harper’s Bazaar), але ваў-кантракт ніяк не падпісваўся.
Але ўжо ў 2010 годзе беларуска дабілася таго поспеху, пра які марыць любая мадэль — стала анёлам Victoria’s Secret. Гэта адна з найвышэйшых ступеняў у мадэлінгу, як «Оскар» для акцёра ці «Грэмі» для музыканта.
Пасля дэфіле ў раскошнай бялізне ад VS Даманькова стала атрымліваць вялізную колькасць прапаноў ад сусветных брэндаў, але менавіта тады кар’еру давялося паставіць на паўзу — Каця выйшла замуж за расійскага мільярдэра і ўладальніка футбольнага клуба «Рэдынг» Антона Зінгарэвіча. Разрывацца паміж Масквой і Нью-Ёркам было складана, таму дзяўчына выбрала сям’ю і паралельна паступіла ў МДІМЗ на журналіста, а ў 2013-м нарадзіла дачку Марусю. Праз два гады шлюб распаўся.
Цяпер Кацярына Даманькова жыве на Кіпры, замужам за IT-бізнэсменам і выхоўвае ўжо чацвярых дзяцей. За гэты час яна паспела стварыць інтэрнэт-партал аб прыгажосці і мацярынстве BeautyHack.ru, а таксама разам з іншай вядомай мадэллю, расіянкай Наталляй Вадзянавай, стаць інвестарам беларускага IT-праекта для жанчын Soula.
Яўгенія Катава — ад брыдкага качаняці да любіміцы Dolce & Gabbana
Жэня Катава нарадзілася ў 1994 годзе ў Барысаве і ніколі не задумвалася аб тым, каб стаць мадэллю. Дзяўчынка доўгі час займалася плаваннем, але праз праблемы са здароўем ёй прыйшлося шукаць іншы занятак.
У Доме культуры пачынаўся кастынг у «Школу модніц», і Жэня вырашыла паўдзельнічаць. Выкладчыца тады прапанавала дзяўчыне паспрабаваць сябе ў якасці мадэлі, але тая была няўпэўненым, закамплексаваным падлеткам і спачатку ўспрыняла яе словы як жарт. Жэня лічыла сябе брыдкім качанём і часта праз гэта плакала. Толькі праз пяць гадоў дзяўчыну ўгаварылі, і яна паехала ў Мінск вучыцца ў мадэльную школу Сяргея Нагорнага.
Яшчэ адной прычынай для пераезду ў сталіцу стала жаданне збегчы далей ад аднакласнікаў, якія дражнілі і крыўдзілі Жэню за высокі рост і худзізну: «Усё жыццё я чула размовы за спінай. Я была худая, як гліст, з вялікімі бровамі, якія я ўвесь час спрабавала схаваць за грыўкай, і наогул на фоне сябровак глядзелася вельмі недарэчна. Гэта быў цэлы квэст — апынуцца далей ад школы, ад нядобрых людзей, якія мяне тады атачалі».
Першую сапраўдную працу Катава атрымала ў 16 год на Тыдні моды ў Польшчы. А ўжо ў 2011 годзе мадэль пераехала ў Нью-Ёрк і ўзяла больш зручны для англійскай мовы псеўданім Zhenya Katava. Да таго часу ў партфоліа Жэні было толькі некалькі здымак, тым не менш яе адразу адправілі на подыум.
Зусім хутка дзяўчыну пачнуць называць беларускай Айшварыяй Рай за падобныя рысы твару і неверагодна прыгожыя вочы. Але Жэні такое параўнанне не вельмі падабаецца, яна лічыць, што больш падобная да Ірыны Шэйк і Мілы Куніс.
Дзяўчына пражыла ў Нью-Ёрку да 2018 года. За гэты час яна паспела пабываць на вокладках глянцу і папрацаваць са шматлікімі сусветнымі брэндамі, сярод якіх Armani, Karl Lagerfeld, Vivienne Westwood, Bottega Veneta, Mark Jacobs. А яшчэ беларуска стала сапраўднай музай Dolce & Gabbana і рэгулярна з’яўлялася на іх паказах.
Сапраўдным прарывам у кар’еры стаў кантракт з Цьеры Мюглерам — Катава стала тварам яго культавых духоў Aura Mugler. Гэтай працай дзяўчына ганарыцца больш за ўсё. Але нягледзячы на поспех, у інтэрв’ю яна будзе часта паўтараць: «Я не лічу сябе нейкім звышнатуральным стварэннем. Так, я ведаю, што сімпатычная, што чагосьці дабілася. Але не стаўлю сябе вышэй за іншых».
У 2018 годзе Жэня прыязджае ў Мінск адпачыць. У Амерыцы яна толькі што разышлася з хлопцам — Артурам Кульковым, адным з самых высокааплатных манекеншчыкаў свету. Выпадкова дзяўчына ўспамінае пра свайго даўняга прыхільніка, з якім пазнаёмілася ў сацсетках. Яны дамаўляюцца аб сустрэчы і з таго дня разам.
Новым выбраннікам мадэлі стаў Віталь Яцук, спадчыннік сеткі магазінаў «Віталюр». Ён атачыў Жэню такой увагай, што тая перадумала вяртацца ў ЗША. Летам 2021 года пара згуляла вяселле, а ў лютым 2023-га ў іх нарадзілася дзіця. Катава цалкам прысвяціла сябе сям’і і вяртаецца да працы мадэлі вельмі рэдка.
Марына Лінчук — вокладкі Vogue і здымкі ў Сафіі Копалы
Марына нарадзілася ў Мінску ў 1987 годзе. Сям’я першыя часы жыла вельмі бедна і тулілася ў камуналцы. З часам айчым заняўся аўтабізнэсам, з’явіліся грошы, і бацькі купілі сваю кватэру.
У 12 гадоў дзяўчынка за кампанію пайшла з сяброўкай на кастынг у мадэльнае агенцтва «Тамара». Як гэта часта бывае, выбралі менавіта яе, а не сяброўку. Марына тады вельмі здзівілася, бо заўсёды лічыла сябе «батанам», ніяк не прыгажуняй, і наогул збіралася паступаць на доктара ці юрыста. Але жыццё распарадзілася па-іншаму.
Праз год Марына ўпершыню трапіла на паказ у Маскву, куды праз некаторы час пераехала і заключыла кантракт з мадэльным агенцтвам IQ Models. Праз некалькі месяцаў ёй прапанавалі працу ў мадэльным агенцтве Японіі, дзе Марына прапрацавала два з паловай гады. Жыць у зусім іншай культуры было складана, да ўсяго дзяўчына не магла спакойна выйсці на вуліцу — высокая бландзінка пастаянна збірала каля сябе натоўп разявак.
Беларуска не здавалася, набіралася вопыту і ўмудрылася за такі кароткі тэрмін практычна дасканала вывучыць японскую мову. Пасля заканчэння кантракта ў 2005 годзе дзяўчына паехала працаваць у ЗША і пасялілася ў Нью-Ёрку.
Пераломным момантам у кар’еры беларускі стала фотасесія ў легенды fashion-фатаграфіі Стывена Майзела ў 2007 годзе. Пасля гэтых здымкаў Марыне сталі прапаноўваць супрацоўніцтва Christian Dior, Versace, Dolce & Gabbana і іншыя знакамітыя брэнды. Усяго за два гады Лінчук дамагаецца статусу супермадэлі і ў 2009 годзе ўваходзіць у спіс «30 самых уплывовых мадэляў свету» па версіі французскага Vogue, побач з Жызэль Бундхен і Наталляй Вадзянавай.
Ад 2008-га Марына некалькі разоў становіцца тварам брэндаў Escada і Dior і рэгулярна выступае на модных паказах калекцый ад Givenchy, Gucci, Alexander McQueen, Versace, Valentino, Chanel, Louis Vuitton, Yves Saint Laurent, Roberto Cavalli — спіс можна працягваць бясконца. Следам ідуць вокладкі Vogue, ELLE і Harper’s Bazaar і здымкі ў Сафіі Копалы спачатку ў роліку парфумаў Miss Dior Chérie, а пазней у фільме «Дзесьці», прэм’ера якога адбылася на Канскім кінафестывалі.
Цяпер Марына замужам за амерыканскім бізнэсменам, працягвае жыць у ЗША і выхоўвае дзвюх дачок. Зрэдку беларуска ўдзельнічае ў паказах. Напрыклад, у лютым 2023 года 35-гадовая Лінчук прайшлася па подыуме на адкрыцці Тыдня моды ў Нью-Ёрку.
Яшчэ адным любімым заняткам для топ-мадэлі сталі падкасты — разам са сваёй калегай Гінтай Лапіня Марына запусціла шоу «the Extra Stitch», у якім адкрыта расказала пра кар’еру ў мадэльным бізнесе і сумяшчэнні яе з роллю мамы.
Вольга Шэрэр — муза Армані і нявестка Стэфана Габана
Вольга нарадзілася ў 1987 годзе ў Мінску. Мадэльную кар’еру дзяўчына пачала ў 2005 годзе з удзелу ў беларускіх Тыднях моды. Аднак сапраўдным стартам можна лічыць 2007 год, калі яна заключыла кантракт з мадэльным агенцтвам New York Model Management і вельмі хутка стала тварам Lanvin і Kenzo.
Пачатак кар’еры быў складаным. Напрыклад, трапіць у аб’ектыў топавага фатографа было амаль нерэальна праз велізарную канкурэнцыю. Трэба было абавязкова добра выступіць на тыдні моды, каб пазней цябе абраў нехта з кастынг-дырэктараў Стывена Майзела, Бэна Хасэта ці Ціма Уокера. А праца з імі — гэта дзверы ў свет высокага глянцу. Вользе ўдалося звярнуць на сябе ўвагу, і дзяўчына стала адной з іх улюбёнак.
У наступныя некалькі гадоў Шэрэр лічыцца адной з найбольш паспяховых мадэляў. Яе графік распісаны па хвілінах, а партфоліа рэгулярна папаўняецца рэкламнымі кампаніямі для Bottega Veneta, Ralph Lauren, Louis Vuitton, Christian Dior, Rick Owens, Alexander McQueen, Dior і Hermès.
У 2011 годзе падчас дабрачыннай фотасесіі для Dolce&Gabbana Шэрэр знаёміцца з Маўрыцыа Габана — супрацоўнікам кампаніі D&G, таленавітым фатографам і братам таго самага Стэфана Габана. Пасля трох гадоў адносін у пары нараджаецца сын Валерыа Мікалай Габана.
Падчас цяжарнасці Вольга не планавала працаваць, хоць і была вельмі запатрабаванай. Амаль ад усіх паказаў Haute Couture мадэль адмовілася, бо баялася гарсэтаў, якія могуць ціснуць на жывот. Але для Джорджыа Армані зрабіла выключэнне — яна даўно стала для яго сапраўднай музай. Беларуска прывабіла маэстра неверагоднай крохкасцю і рудым колерам валасоў — менавіта з яго падачы ў модных колах яе сталі называць «рудой шэльмай».
Армані хацеў бачыць на сваім паказе One Night Only Rome толькі Вольгу, яго не бянтэжыў нават яе пяцімесячны жывот. Калі дзяўчына прымярала адзін з пінжакоў, а той ніяк не зашпільваўся, Джорджыа крычаў ёй: «Проста ўдыхні! Яшчэ мацней!»
Пасля нараджэння дзіцяці Вольга вярнулася на подыум. Мацярынства не перашкодзіла ёй працягнуць кар’еру мадэлі, і дзяўчына вельмі гэтым ганарыцца. Цяпер беларуска жыве ў Мілане з мужам і сынам, працягвае здымацца для вокладак Vogue, Harper’s Bazaar і Elle і працаваць на паказах сусветных брэндаў.
Таццяна Дзягілева — самая сэксуальная беларуска
Таня Дзягілева нарадзілася ў Віцебску ў 1991 годзе. У дзяцінстве дзяўчынка займалася балетам, ва ўзросце 11 гадоў яе заўважыў скаўт мадэльнага агенцтва, і ўжо ў 14 Таня ўпершыню прыняла ўдзел у Тыдні моды ў Мілане. Дэбют прайшоў паспяхова, і адразу пасля першых паказаў беларуску засыпалі кантрактамі сусветныя брэнды. У 2006 годзе яна ўжо насіла статус «супермадэль».
Ад таго ж года Дзягілева працуе на паказах Chanel, Christian Dior, Hermès, Versace, Prada, Donna Karan, Calvin Klein. А праз тое, што для іншаземцаў славянскія прозвішчы складаныя ў вымаўленні, беларуска становіцца для ўсіх Таняй Дзі (Tanya D).
Дзягілева вылучаецца сярод іншых мадэляў сваёй яркай іншапланетнай знешнасцю. Твар «эльфа» дазволіў дзяўчыне не толькі скарыць высокі подыум, але і рэгулярна з’яўляцца на вокладках глянцу.
Цікава, што з усіх «прышэльцаў» менавіта Таню многія модныя эксперты называюць самай прыгожай. У 2010 годзе часопіс Esquire, які стварыў сэксуальны атлас планеты Зямля, назваў мадэль самай сэксуальнай ураджэнкай Беларусі. А яшчэ яна ўваходзіць у васьмёрку самых стройных мадэляў (так, ёсць і такія рэйтынгі). Дарэчы, дзяўчына ніколі не сядзела на дыетах, такі целасклад перадаўся ёй ад бацькоў.
Таццяна Дзягілева лічыцца адной з самых працавітых мадэляў. У некаторыя сезоны яна можа ўдзельнічаць у больш чым сотні паказаў, што з’яўляецца рэкорднай колькасцю нават для такіх запатрабаваных зорак, як Наомі Кэмпбел або Кейт Мос.
Беларуска некалькі разоў станавілася тварам кампаній Hugo Boss, Yves Saint Laurent і Jean Paul Gaultier, адкрывала і закрывала шоу Celine Elie, Saab і Nina Ricci, а таксама здымалася ў самых вядомых сусветных фатографаў. Яна настолькі натхнілася працай з імі, што сама стала вучыцца мастацтву фатаграфіі. Акрамя таго, дзяўчына вывучылася на дызайнера ў Мілане і скончыла бізнэс-школу.
Вядомая Дзягілева і сваім бурным асабістым жыццём. Адзін з самых гучных яе раманаў — адносіны з расійскім алігархам Дзмітрыем Рыбалоўлевым. Той часта ў інтэрв’ю казаў пра Таню, што яна была ледзь не адзінай яго дзяўчынай, якая не палявала на яго грошы.
Цяпер беларуска жыве ў Парыжы, займаецца fashion-фатаграфіяй і сумяшчае працу мадэлі і дызайнера-стыліста.
Каментары