Зборная Літвы не хоча гуляць з беларускамі ў футбол. І нават згодная на дзве тэхнічныя паразы
У аўторак у швейцарскім Ньёне прайшло лёсаванне кваліфікацыі чэмпіянату Еўропы сярод жаночых зборных. Беларусь патрапіла ў групу C1, дзе таксама аказаліся Кіпр, Грузія і Літва.
Траплянне ў адну групу з падапечнымі Юрыя Малеева не ўзрадавала нашых паўночна-заходніх суседзяў. Там ад самага пачатку поўнамаштабнай вайны ва Украіне паслядоўна прытрымліваюцца пазіцыі, што да яе заканчэння расійскія і беларускія спартсмены не павінны ўдзельнічаць у міжнародных спаборніцтвах. А год таму літоўскі Сейм аднагалосна прыняў рэзалюцыю, якая заклікае да забароны беларуска-расійскага ўдзелу ў Алімпіядзе-2024. Пры гэтым сваім спартсменам спаборнічаць з прадстаўнікамі Беларусі і РФ літоўскія палітыкі не забаранялі, піша «Трыбуна».
Дык вось, з той пары, як пачалася вайна, літоўцы ўжо ў які раз натрапляюць на беларусаў у футболе і не атрымліваюць ад гэтага ніякай радасці. Спачатку лёсаванне звяло зборныя ў футзале. Літва ўвогуле не хацела гуляць з беларусамі, але пад пагрозай бана ад УЕФА пагадзілася правесці два матчы на нейтральнай тэрыторыі ў Арменіі — і нечакана выкінула суперніка з кваліфікацыі да чэмпіянату свету.
Другі раз мусілі сустрэцца ўжо мужчынскія футбольныя зборныя Літвы і Беларусі ў стыках за права застацца ў дывізіёне С Лігі нацый. Аднак праз падаўжэнне бана Расіі каманда Алоса аўтаматам захавала права гуляць у дывізіёне С, а Літва атрымала ў стыках Гібралтар.
А цяпер гуляць з Беларуссю павінна ўжо жаночая зборная Літвы — і зноў праблема. Прэзідэнт літоўскай федэрацыі футбола Эдгарас Станкявічус назваў чарговае перасячэнне з беларускім супернікам праклёнам. А яшчэ заявіў, што гуляць з камандай Малеева літоўскі бок не мае намеру:
«Лёс грае з намі злы жарт. У нас ёсць гэты праклён, які зводзіць нас з Беларуссю. У мінулым годзе гулялі зборныя па міні-футболе, павінны былі сустрэцца і мужчынскія зборныя ў вялікім футболе, але ўдалося зманеўраваць і не згуляць. Цяпер фартуна «ўсміхнулася» жаночай зборнай. Калі казаць пра спартыўны бок, то лёсаванне цалкам спрыяльнае.
Усе тры каманды можна перамагчы, але гуляць з Беларуссю мы дакладна не плануем», — заявіў Станкявічус.
Сваю заяву кіраўнік футбола Літвы падмацоўвае таксама гатоўнасцю атрымаць пакаранне ад УЕФА, праўда, разлічвае, што яно абмяжуецца тэхнічнымі паразамі.
«Вельмі спадзяюся, што санкцыі абмяжуюцца тэхнічнымі паразамі 0:3, і нашыя дзяўчаты працягнуць удзельнічаць у адборы. Яны здольныя пазмагацца за другое месца ў групе і месца ў наступным раўндзе. Але пакуль такога прэцэдэнту не было. Для мяне самае галоўнае, каб нас не дыскваліфікавалі. Гэта было б самым балючым, бо панізіць у класе нас не могуць — дывізіёна D няма», — канстатаваў Станкявічус.
Капітан зборнай Мільда Люжынайце таксама сказала, што гуляць з беларускамі Літва не будзе, спадзеючыся, што каманда атрымае проста тэхнары і зможа выйсці з групы з другога месца.
«Нам не пашанцавала з лёсаваннем. Пазіцыя адназначная: мы з імі гуляць не будзем. Будзем шукаць таварыскія матчы, каб захаваць тонус. З групы можна выходзіць. Нават без гэтых дзвюх гульняў мы можам фінішаваць другімі ў групе», — сказала Люжынайце.
Варта адзначыць, другога месца для праходу далей можа быць недастаткова. З дывізіёна С пры наяўнасці пяці груп у стыкі выходзіць толькі тры найлепшыя каманды, якія фінішуюць на другой пазіцыі ў сваіх групах.
Чыноўнік Мінспорту выпадкова раскрытыкаваў стан спраў у беларускім спорце
Гульцы бразільскага клуба двойчы зацягвалі на поле футбаліста з траўмай дзеля зацяжкі часу
Ужо экс-зорку зборнай Францыі па футболе дыскваліфікавалі на чатыры гады за допінг
У новым сезоне Лігі Нацый Беларусь патрапіла ў Лігу C без патрэбы гуляць за выжыванне
Каментары