Беларускія ўлады рыхтавалі раскладку мінаў «Лепесток» з польскага боку мяжы — Байпол
Байпол расказаў версію, што стаіць за забойствам польскага вайскоўца на беларуска-польскай мяжы.
Байпол піша, што Масква зʼяўляецца перавалачнай базай мігрантаў з Афрыкі і Азіі ў краіны Еўрасаюза. Мігрантаў дзеляць на тых, хто паедзе ваяваць ва Украіну, і тых, хто паедзе ў Беларусь ствараць міграцыйны крызіс на мяжы.
Паводле былых сілавікоў, у Мінску ў раёне Уручча на базе вучэбнага цэнтра «Дынама» мігранты праходзяць навучанне ў інструктараў спецпадраздзялення пагранічных войскаў Рэспублікі Беларусь — Асобнай службы актыўных мерапрыемстваў (ВЧ 1250).
«Мігранты навучаюцца выбуховай справе, як арыентавацца ў лесе, непрыкметна перасоўвацца па сцежках, рабіць праходы ў плоце, карыстацца компасам. Пасля навучання мігранты дзеляцца на групы 10-12 чалавек і перавозяцца на мяжу з Польшчай у размяшчэнне памежных застаў», — сцвярджае Байпол.
Паводле былых сілавікоў, 28 мая 2024 года спецслужбамі Беларусі на беларуска-польскім участку мяжы ў раёне вёскі Дубічы Царкоўныя была запланаваная правакацыя.
Некаторым мігрантам раздалі нажы і навучылі імі карыстацца. Акрамя таго, са складоў былі дастаўленыя супрацьпяхотныя фугасныя міны «Лепесток» (ПФМ-1) вытворчасці СССР. Характэрнай рысай дадзенай міны зʼяўляецца тое, што яна пры выбуху практычна не ўтварае забойных аскепкаў і наносіць пашкоджанне толькі таму, хто на яе наступіў.
«Дадзеныя міны ў колькасці каля 30 штук мігранты павінны былі раскідаць ужо на польскай тэрыторыі для таго, каб справакаваць падрыў каго-небудзь, каб абвінаваціць Польшчу ў выкарыстанні мін супраць мігрантаў. У беларускім грамадстве загадзя запушчаны слых, што палякі замініравалі мяжу. Аднак падчас спробы прарыву мяжы міны не ўдалося пераправіць на польскі бок, адзін з мігрантаў ударыў польскага салдата 1-й бранятанкавай брыгады Матэвуша Сітака нажом, ад чаго той пазней памёр у шпіталі», — піша Байпол.
Байпол абяцае назваць прозвішчы тых супрацоўнікаў, хто да гэтага датычны.
Цяпер чытаюць
Лукашэнка: Пры цяперашнім цячэнні вайны Беларусь з Расіяй не змаглі б абараніць беларускай мяжы ад Украіны9
Каментары