Туск на румынскай выступіў у парламенце Малдовы і паабяцаў дапамогу з уступленнем у ЕС — ВІДЭА
20 кастрычніка ў краіне пройдзе рэферэндум па ўступленні ў Еўрасаюз.
Прэм'ер-міністр Польшчы Дональд Туск у сераду выступіў у парламенце Малдовы, у сваім звароце, часткова на румынскай мове, ён паабяцаў малдаванам дапамогу з уступленнем у ЕС, паведамляе Newsmaker.
Туск адзначыў перспектывы ўступлення Малдовы ў Еўрапейскі Саюз. «Кожны з вас, хто бываў у Польшчы, мог параўнаць, які выгляд яна мела калісьці і які мае сёння. Безумоўна, змены чакаюць і Малдову», — падкрэсліў ён.
У той жа час прэм'ер-міністр Польшчы перакананы, што рашэнне аб уступленні Малдовы ў ЕС павінен прыняць народ, а не лідары краіны. Ён таксама заявіў, што дапаможа Малдове паскорыць працэс еўраінтэграцыі, калі старшынства ў Радзе ЕС пяройдзе ў Польшчу.
«Для мяне важна паскорыць гэты працэс і зрабіць гэты фінал рэальным. Калі вы гэтага хочаце, калі вы так вырашыце [на рэферэндуме], я зраблю ўсё магчымае, каб Еўропа эфектыўна падтрымлівала вас і дапамагала вам на гэтым шляху», — паабяцаў Дональд Туск.
На заканчэнне звароту кіраўнік польскага ўрада звярнуўся да грамадзян Малдовы на румынскай мове.
«Вы, як нацыя, праявілі неверагоднае цярпенне, настойлівасць і адказнасць. Вы прайшлі праз вельмі цяжкія выпрабаванні, але крок за крокам будуеце сучасную дзяржаву. Давайце выкарыстоўваць гэтую магчымасць разам. Я буду ў вашым распараджэнні. Вы заўсёды зможаце разлічваць на Польшчу, калі захочаце ўступіць у Еўрапейскі Саюз», — сказаў прэм'ер-міністр.
Падчас візіту ў Кішынёў Туск таксама выказаў упэўненасць, што падчас польскага старшынства ў Радзе ЕС еўраінтэграцыя Малдовы паскорыцца.
У чэрвені ЕС афіцыйна запусціў перамовы аб уступленні з Украінай і Малдовай. 20 кастрычніка ў Малдове пройдуць прэзідэнцкія выбары. Адначасова з імі вырашылі арганізаваць рэферэндум па ўступленні Малдовы ў ЕС.
-
Ругінене: Літва гатова разгледзець запыт ЗША аднавіць транзіт беларускіх угнаенняў, калі ён будзе
-
Кіраўнік МЗС Азербайджана паведаміў пра «сур'ёзныя пытанні» да Масквы праз закрыццё справы аб катастрофе лайнера AZAL
-
Зяленскі дапусціў, што Трамп можа прыехаць ва Украіну для падтрымкі плана мірнага пагаднення
Каментары