Што вядома пра гіганцкі дрон С-70 «Ахотнік», збіты над Канстанцінаўкай
Днём 5 кастрычніка вялікі лятальны апарат быў збіты побач з горадам Канстанцінаўка ў Данецкай вобласці. На думку спецыялістаў, гэта найноўшы расійскі рэактыўны БПЛА С-70 «Ахотнік». У чым яго адметнасць, піша ВВС.
Кадры збіцця апарата, які першапачаткова прынялі за расійскі знішчальнік, пачалі распаўсюджвацца ў сацсетках каля 13:00 у суботу, 5 кастрычніка.
На відэа зняты момант паражэння гэтага БПЛА авіяцыйнай ракетай, якую імаверна, выпусціў расійскі самалёт.
«На тэрыторыі Канстанцінаўскай абшчыны ўпаў лятальны апарат», — паведаміў кіраўнік Данецкай абласной вайсковай адміністрацыі Вадзім Філашкін.
«У выніку падзення абломкаў у прыватным сектары ўзнік пажар, пашкоджаныя прыватныя дамы… Папярэдне — без пацярпелых».
Адразу пасля інцыдэнту кіраўнік Канстанцінаўскай гарадской адміністрацыі Сяргей Гарбуноў паведаміў, што гэта ўкраінскія вайскоўцы збілі варожы самалёт.
Кіраўнік АВА таксама выклаў фота наступстваў падзення лятальнага апарата і частку яго фюзеляжа з чырвонай зоркай, якая з'яўляецца сімвалам арміі РФ.
Кіраўнік Цэнтра процідзеяння дэзінфармацыі пры РНБА Андрэй Каваленка напісаў, што гэта можа быць ці самалёт Су-34 або найноўшы расійскі БПЛА С-70 «Ахотнік».
«Канчаткова стане зразумела пасля даследавання абломкаў», — дадаў ён.
Эксперыментальная зброя
Расійскія ваенныя блогеры ўпэўненыя, што збіты апарат — гэта найноўшы БПЛА С-70.
Так, тэлеграм-канал Figterbomer, які спецыялізуецца на расійскай вайсковай авіяцыі, напісаў некалькі версій таго, што магло адбыцца ў небе над Канстанцінаўкай. Гэта, у прыватнасці, магла быць страта кіравання БПЛА, уздзеянне РЭБ і адмова электронікі апарата.
Украінскі партал «Мілітарний» пацвярджае, што гэта быў БПЛА «Ахотнік».
Профільнае выданне Defense Express адзначае, што з высокай доляй верагоднасці на відэа зафіксавана першае збіццё гэтага найноўшага расійскага ўдарнага дрона.
Гэта фактычна беспілотны знішчальнік суправаджэння, ён суправаджае баявы самалёт і нясе ўзбраенне, пашыраючы такім чынам магчымасці асноўнага знішчальніка.
На кадрах, якія трапілі ў сетку, відаць, што С-70 ляцеў у пары з іншым самалётам, які ў пэўны момант выпусціў ракету.
«Ахотнік» упаў у раёне Канстанцінаўкі, што прыкладна за 12 кіламетраў ад лініі баявога сутыкнення. Такім чынам, эксперыментальны апарат ляцеў ужо ў паветранай прасторы, якую кантралююць УСУ.
С-70 распрацоўвае расійская авіякарпарацыя «Сухой» з 2012 года. Дакладныя характарыстыкі БПЛА невядомыя. Як мяркуецца, гэта можа быць дагукавы апарат, які можа ляцець у пары з знішчальнікамі Су-57 і Су-35.
Памеры БПЛА досыць уражлівыя: даўжыня — 14 м, размах крыла — 19 м, узлётная маса беспілотніка складае больш за 20 тон.
Ён можа несці ва ўнутраных адсеках ракеты і авіябомбы агульнай масай да 2,8 тоны.
Па планах распрацоўшчыкаў, рэактыўны «Ахотнік» будзе выкарыстоўвацца для ўдараў па аб'ектах праціўніка без заходу пілатуемых самалётаў у зону дзеяння сістэм супрацьпаветранай абароны.
Заяўленая далёкасць палёту — каля 5-6 тысяч кіламетраў з хуткасцю 1400 км/г.
27 верасня 2019 года Мінабароны Расіі паведаміла пра першы сумесны палёт «Ахотніка» і Су-57, які доўжыўся больш за 30 хвілін. Пазней расійскія ўлады заявілі аб пачатку серыйнай вытворчасці цяжкага рэактыўнага БПЛА з 2023 года.
Пасля гэтыя тэрміны пераносіліся. Апошнія агучаныя абяцанні — старт серыі ўжо ў другой палове бягучага года.
Па некаторых даных, сёння РФ мае толькі чатыры прататыпы «Ахотніка» і яшчэ некалькі будуюць.
«Можна асцярожна выказаць здагадку, што перад стартам серыйнага вытворчасці расейцы вырашылі пратэставаць свае прататыпы непасрэдна на поле бою», — лічаць аналітыкі Defense Express.
Калі Расіі ўсё ж удасца запусціць серыйную вытворчасць гэтага найноўшага БПЛА, то гэта будзе сур'ёзным выклікам для ўкраінскай супрацьпаветранай абароны.
Паводле задумы распрацоўшчыкаў, гэты цяжкі дрон з'яўляецца малапрыкметным для СПА і мае надзвычай шырокую наменклатуру ўзбраення на борце.
Так, згодна з агучанымі расійскімі ўладамі заявамі, «Ахотнік» зможа несці кіраваныя авіябомбы і высокадакладныя ракеты з карэкціроўкай курсу палёту.
Фактычна, расійская армія атрымае ў сваё распараджэнне беспілотны самалёт, які зможа залятаць углыб тэрыторыі праціўніка, весці разведку і знішчаць аб'екты высокадакладнымі боепрыпасамі.
Праўда, падзенне «Ахотніка» над Канстанцінаўкай ад неўстаноўленых абставін ставіць пад сумнеў гатоўнасць гэтага вырабу да практычнага выкарыстання.
Свецкае жыццё Дар’і Шманай: дні нараджэння дзяцей Кіркорава і Comedy Club4
Каментары
На пачатку яго распрацоўкі ніхто ня ведаў пра магчымасці маленькіх камікадзе , квадракоптараў ... памерам з птушку . Пра радыёнепрэкметнасць гэта
" рускія народныя " казкі на ўзроўні Арматы - Сарматы ) Хай сабе гроші з дзяржаўнай кішэні ва ўласныя перасоўваюць .