Былога прэзідэнта Бразіліі будуць судзіць па абвінавачванні ў спробе дзяржаўнага перавароту
Жаір Балсанару прайграў выбары ў 2022 годзе, пасля чаго ў краіне пачаліся пратэсты. Па версіі паліцыі, былы прэзідэнт адыгрываў вядучую ролю ў планаванні і арганізацыі спробы перавароту, піша Reuters.
Экс-прэзідэнта Бразіліі і былога армейскага капітана абвінавачваюць у пяці злачынствах, у тым ліку ў спробе гвалтоўнай адмены дэмакратычнага вяршэнства закона і дзяржаўным перавароце.
Разам з Балсанару падсуднымі будуць больш за 30 чалавек, якіх абвінавачванне лічыць яго саўдзельнікамі.
Пратэсты ў Бразіліі адбываліся пасля інаўгурацыі новага прэзідэнта Лула да Сілвы ў 2023 годзе, які перамог у другім туры з 50,9% галасоў.
Падчас пратэстаў прыхільнікі Балсанару ўварваліся ў будынкі парламента і Вярхоўнага суда, а таксама ў прэзідэнцкі палац. Сотні чалавек былі затрыманыя.
У чэрвені суддзі вышэйшага выбарчага суда краіны палічылі, што экс-прэзідэнт адказны за «пагібельныя для дэмакратыі наступствы» гэтых дзеянняў. Яму на восем гадоў забаранілі балатавацца ў прэзідэнты. Сам Балсанару адхіляе ўсе абвінавачванні — падчас пратэстаў ён знаходзіўся ў Фларыдзе.
Правы папуліст Жаір Балсанару быў прэзідэнтам краіны з 2019 па 2022 год. Тады ён абвясціў вайну «культурнаму марксізму», пад якім меўся на ўвазе «лібералізм».
Балсанару сфарміраваў урад на траціну з сілавікоў, абмежаваў дазволеныя падставы для абортаў, планаваў выйсці з Парыжскага пагаднення па барацьбе з пацяпленнем клімату, адмаўляў кавід, а таксама хацеў «ачысціць» Бразілію ад геяў і курсаў полавага выхавання ў школах.
Цяпер чытаюць
«Да акцыі далучыліся толькі маргіналы». Што пісаў у чатах пасля свайго выкрыцця кадэбэшнік, адказны за беларускую эміграцыю3
Каментары