У Мінску людзей кармілі здыхляцінай, нават дзяцей у садках

Пяць гадоў у Мінску і раёне людзей кармілі мясам з могільнікаў. Пра гэта стала вядома з даклада Генеральнай пракуратуры, тэкст якой «Белпол» здабыў і перадаў «Белсату». Выяўленыя ўдзельнікі арганізаваных груп, якія перапрацоўвалі падаль, якую збіралі ў Гомельскай, Мінскай і Магілёўскай абласцях.

Ліст аб прычынах незаконнага абароту мяса старшыня Следчага камітэта Дзмітрый Гара скіраваў у сакавіку тагачаснаму прэм’ер-міністру Раману Галоўчанку.

Пазней віцэ-прэм’ер па сельскай гаспадарцы Юрый Шулейка разаслаў міністрам гандлю, сельскай гаспадаркі, аховы здароўя, старшыням аблвыканкамаў, а таксама старшыні Дзяржстандарту просьбу разгледзець узнятыя СК праблемы. 

Следства лічыць арганізатарам схемы індывідуальнага прадпрымальніка Аляксандра Старавойтава. Схема дзейнічала ў 2021—2024 гадах.

Як мяркуе СК, Старавойтаў меў пад кантролем тры ТАА: «РэалМiтГандаль», «Аграмітстар» (спыніла дзейнасць у выніку рэарганізацыі 28 снежня 2023 года) і «Мітконер». Першая фірма закупляла, у тым ліку праз біржу, мяса і перадавала другой фірме перапрацоўваць і фасаваць. Але штука ў тым, што законна купленую ялавічыну змешвалі з незаконна здабытай, у тым ліку з падлай.

Следства даказала, што на перапрацоўванне паступіла не менш за 57 тонаў недабраякаснага мяса.

Нарыхтоўчы цэх дзейнічаў у найманым памяшканні ў жылым масіве сталіцы. Пазначаны ў лісце адрас — вул. Лідская, 22 — супадае з адрасам ЖЭУ № 9 Фрунзенскага раёна Мінска. Пад тым жа адрасам месцяцца пункт аховы парадку, ветэрынарная клініка, дзіцячыя і дарослыя студыі танцаў і спеваў. 

Павялічыць

Гэты цэх фармальна налічваў 5,5 працаўніка: бухгалтар на паўстаўкі, адзін жылоўшчык мяса, дырэктар, тэхнолаг, ветэрынар і прыбіральнік.

Як сцвярджае СК, да працы з мясам прыцягвалі «розных асоб, у тым ліку тых, якія вялі асацыяльны лад жыцця, без афармлення працоўных стасункаў і выканання патрабаванняў наконт абавязковага папярэдняга медычнага агляду».

Перапрацоўвалі не менш за тысячу тонаў прадукцыі за год, высветлілі следчыя.

«Аграмітстар» і «Мітконер» называлі сябе аб’ектамі грамадскага харчавання. Як яны, так і «РэалМiтГандаль», не былі нават у Гандлёвым рэестры ці Рэестры вытворцаў. 

Пасля перапрацоўвання фірма прадавала паўфабрыкаты оптам, у тым ліку ГКУП «Дробнааптовая база на Заходняй».

Якраз апошняя кампанія забяспечвала прадуктамі садкі Мінска і раёна, а таксама школы і бальніцы.

Улады справу засакрэцілі, але інфармацыю апублічыў «Белпол», у рукі якога трапіў даклад Генпракуратуры.

• 1
• 0
• 8
• 19
• 13
• 1
• 14
• 0