У Брэсце напрыканцы чэрвеня пачнецца рэканструкцыя аўтамабільнага моста цераз раку Мухавец у цэнтральнай частцы горада. Пра гэта паведаміў дырэктар Упраўлення капітальнага будаўніцтва Брэста Ігар Касянкоў, піша БелТА.
Гаворка ідзе пра мост, які злучае бульвар Шаўчэнкі і Варшаўскую шашу. Генеральным падрадчыкам выбралі «Мостаатрад №58» — філіял ААТ «Мостабуд». Дамову з імі плануюць падпісаць 20 чэрвеня, а ўжо на наступным тыдні пачаць першыя работы.
Рэканструкцыя будзе праходзіць паэтапна. Спачатку падрыхтуюць пляцоўку, перанясуць інжынерныя камунікацыі і абсталююць будаўнічы гарадок. Потым пачнецца будаўніцтва новай часткі моста. Яго плануюць завяршыць да канца наступнага года і адкрыць па гэтай частцы рух. Пасля гэтага ў 2027 годзе дэмантуюць стары мост, а на яго месцы пабудуюць другую частку новага.
Праект фінансуецца з крэдыту Банка развіцця. У 2025 годзе на работы выдзелена каля 8,8 мільёна рублёў. Увесь праект разлічаны на 43 месяцы.
Брэсцкі мост праз Мухавец быў пабудаваны ў 1960‑х гадах і ўжо не адпавядае сучасным патрабаванням. Новая канструкцыя будзе з жалезабетону, а цэнтральная частка — металічнай. У абноўленым мосце прадугледжаныя дзве паласы руху ў кожны бок (цяпер толькі адна), шырэйшыя тратуары для пешаходаў і раварыстаў, новае асвятленне. Таксама перабудуюць кольца на бульвары Шаўчэнкі, пашыраць дарожныя палосы з боку Варшаўскай шашы і зробяць дадатковыя заезды і з’езды з моста.
Рух падчас работ цалкам перакрывацца не будзе, але магчымыя часовыя нязручнасці — напрыклад, трэба будзе пераносіць шматлікія кабельныя лініі з боку бульвара Шаўчэнкі.
Цяпер чытаюць
Гісторыя 12‑гадовай Веры ў мінскай інфекцыйнай бальніцы настолькі ўразіла беларусаў, што цяпер чарга з ахвотных дапамагчы4
Каментары