Ва ўкраінскім Генштабе адзначылі, што эфектыўнасць сродкаў радыёэлектроннай барацьбы (РЭБ) супраць расійскіх ракет «Кінжал» за апошні год значна вырасла. Гэтая зброя ўсё часцей не дасягае прызначаных цэляў, а ўкраінскія сістэмы РЭБ сталі паказваць лепшыя вынікі, піша «Суспільне».
Крыніца выдання ў Генеральным штабе УСУ патлумачыла, што чым хутчэй рухаецца ракета, тым складаней ёй правільна вызначаць свае каардынаты. Менавіта гэта робіць яе больш уразлівай да радыёперашкод. Павелічэнне колькасці і магчымасцяў украінскіх сістэм РЭБ дало магчымасць больш эфектыўна ўздзейнічаць на такія ракеты.
У выніку ўдасканалення ўкраінскіх сістэм РЭБ Расія панесла істотныя фінансавыя страты. Паводле ацэнак, намаганні ў супрацьдзеянні РЭБ абышліся расійскаму боку як мінімум у 1,5 мільярда даляраў. Гэта звязана з тым, што яны вымушаныя ставіць на ракеты дарагія антэнныя модулі CRPA (абароненыя ад перашкод). Такія антэнныя сістэмы выкарыстоўваюцца ў кіраваных авіяцыйных бомбах (КАБ) і ў дронах-камікадзэ «Шахед». Кошт адной антэны — ад 10 да 17 тысяч даляраў.
За гэты час Расія выпусціла каля 8 тысяч КАБаў і прыкладна 40 тысяч «Шахедаў». Усе яны абсталяваныя антенамі CRPA, што разам склала каля паўтара мільярда даляраў выдаткаў.
Акрамя таго, з часам расійскі бок пачаў выкарыстоўваць усё больш складаныя тэхналогіі: калі раней гэта былі 4-элементныя прыёмнікі, то цяпер ужо 8– і нават 16-элементныя антэнныя сістэмы.
Каментары