Спявак, музыка, кампазітар і прадпрымальнік Пятро Клюеў да лютага 2022 года быў удзельнікам гурту ЛСП, вакалістам якога з’яўляецца віцябчук Алег Саўчанка. З пачаткам поўнамаштабнай вайны ва Украіне ён «адмовіўся ад вядомасці ў Рашцы» і перабраўся ў Еўрасаюз.
Апошнім яркім публічным выступам Клюева можна лічыць калядны кватэрнік Маргарыты Ляўчук у 2023 годзе.
Вясной 2024‑га знаёмыя Пятра ўвогуле пачалі панікаваць: «чалавек знік!» А потым высветлілася, што Клюеў залёг на дно па прычыне грашовых пазык, якія не мог аддаць. І выступы ў яго здараліся, але амаль падпольна, каб тыя, каму ён вінны грошы, не прыйшлі па іх.
Сам Пятро ўсё адмаўляў. «У мяне няма доступу да некаторых сацсетак, і таму я не мог выйсці на сувязь», — заяўляў творца. Праўда, як даведалася «Наша Ніва», некаторым ён дагэтуль не вярнуў пазыкі.
Што яшчэ адбываецца цяпер у жыцці Пятра?
У сваім тыктоку Клюеў прызнаецца, што з пераездам у Еўропу яму было нялёгка, хацелася адысці ад пазнавальнасці выключна па ЛСП, тым больш, што група працягвае гастраляваць па Расіі. Пятро, у сваю чаргу, пісаў новыя песні і ў 2024 годзе выпусціў альбом Punk's Line свайго праекта Love Machine.
Пры гэтым, як заўважаюць каментатары, увесь свой блог ён напаўняе кантэнтам, так ці інакш завязаным на ЛСП: «Як я пазнаёміўся з Алегам ЛСП», «Сакрэт, які ведалі толькі ўдзельнікі ЛСП», «Калі ЛСП выступіць у Еўропе».
Дарэчы, на сольным канцэрце ў Варшаве, які запланаваны на красавік 2026 года, Пятро плануе граць у тым ліку хіты, створаныя для ЛСП — напрыклад, «Маленькага прынца», для якога Клюеў напісаў музыку.
Клюеў часам выступае з папулярным рэперам з Украіны T-fest. У вольны ж час любіць падыходзіць да вулічных музыкаў у Варшаве ў вобразе рабочага з прапановай сыграць пару акордаў — і калі пачынае спяваць свае і чужыя песні, здзіўляе ўзроўнем выканання тых, хто яго не ведае.
Акрамя таго, апошнія пяць месяцаў Пятро працаваў над сайтам ArtGo — ён дазваляе аўтаматызаваць працу паміж замоўцам і артыстамі.
Так, за 6 тысяч еўра вы можаце запрасіць да сябе на дзень народзінаў спявачку Леру Яскевіч, адразу абраўшы патрэбную дату ў календары. За 500 еўра — коміка Антона Дзюбайлу, а за дзве тысячы еўра (за гадзіну) — самога Пятра Клюева. Сціплым яго назваць цяжка: сам сябе ён апісвае як «найлепшага поп-музыку ўсіх часоў» і «легенду».
Прасоўвае сайт Клюеў на польскай мове — вялікую частку маленства ён пражыў у Польшчы, бо там вучылася яго маці. Таму ён добра валодае мовай і нават выкладаў яе нейкі час у падпольным Ліцэі імя Якуба Коласа ў Мінску.
Паэт Віталь Рыжкоў пра званне сэкс-сімвала паэзіі, батл з Найдзёнавым, Каржа і Ціханоўскую
Топ артыстаў новай хвалі, якія робяць песні па-беларуску
Ілля Чарапко-Самахвалаў, які пакідае «Пятлю прыхільнасці», усё ж прыме ўдзел у восеньскім туры
Ён быў першым беларусам на «Еўрабачанні» і зоркай, якую ведала ўся краіна — Міхаіл Фінберг
Каментары
Гэта не першая і не апошняя асоба, якая камусьці вісіць грошы.
Ну і проста гэта спосаб канкураваць з тым самым Клюевым.