Ізраіль высылае «Лекараў без межаў» з сектара Газа. Медыкі адмовіліся даваць імёны сваіх людзей у рукі сілавікоў, асцергаючыся рэпрэсій супраць персаналу
Канфлікт паміж ізраільскімі ўладамі і найбуйнейшай гуманітарнай місіяй свету завяршыўся жорсткім рашэннем: арганізацыя «Лекары без межаў» (MSF) мусіць цалкам згарнуць сваю дзейнасць у сектары Газа да канца лютага. Ізраіль забараніў медыкам працаваць у рэгіёне пасля таго, як яны адмовіліся выканаць патрабаванне сілавікоў — перадаць пашпартныя звесткі ўсіх сваіх супрацоўнікаў, уключаючы мясцовы палесцінскі персанал.
Ізраільскае Міністэрства па справах дыяспары настойвае, што гэта стандартная працэдура «бяспекі і празрыстасці», закліканая выявіць сувязі гуманітарных работнікаў з тэрарыстычнымі групамі. Аднак для лекараў такое патрабаванне стала «чырвонай лініяй», піша выданне The Insider.
Прадстаўнікі арганізацыі патлумачылі, што пасля шматмесячных перамоў Ізраіль так і не даў ніякіх гарантый бяспекі для людзей з гэтых спісаў. У сітуацыі, калі медыкі ў Газе пастаянна сутыкаюцца з запалохваннем, адвольнымі затрыманнямі і гібеллю, выдача асабістых звестак вайсковаму ведамству выглядае як прамая пагроза для жыцця персаналу.
Пазіцыя «Лекараў без межаў» грунтуецца на жахлівай статыстыцы: з кастрычніка 2023 года ў рэгіёне загінулі ўжо 1700 медыцынскіх работнікаў, сярод якіх 15 былі супрацоўнікамі самой арганізацыі.
Выданне The Insider са спасылкай на ізраільскія крыніцы цытуе міністра Аміхая Шыклі, які абвінаваціў медыкаў у каардынацыі з ХАМАС і наўмысным хаванні тэрарыстаў сярод персаналу. Але самі гуманітарыі мяркуюць, што за гэтымі абвінавачаннямі стаіць спроба знішчыць незалежны кантроль над тым, што адбываецца ў бальніцах.
Наступствы гэтага рашэння для мірнага насельніцтва будуць катастрафічнымі. «Лекары без межаў» працуюць у рэгіёне з 1988 года і за гэты час сталі сапраўдным падмуркам мясцовай медыцыны. Толькі летась арганізацыя забяспечыла пятую частку ўсіх бальнічных ложкаў у Газе і на Заходнім беразе, а яе лекары прынялі кожныя трэція роды. Агулам за год медыкі правялі каля 800 тысяч кансультацый.
Хто будзе выконваць гэтую працу пасля адыходу арганізацыі ў сакавіку — застаецца невядомым.
Каментары
Это вражда тысячелетняя. Америка его покрывает, здесь без вариантов, палестинцам надо по предложению президента Трампа перебираться на новые земли.