Праезд у мінскай маршрутцы, што меўся падаражэць да пяці рублёў, будзе каштаваць меней
На мінулым тыдні стала вядома, што сталічная маршрутка №1183 («Аўтазаводская» — «Ждановічы») павялічыць кошт праезду адразу на 43%: з трох рублёў 50 капеек да 5 рублёў.
Пасля гэтага перавозчыкам зацікавіліся падатковая служба і Транспартная інспекцыя. І вось вынік: праезд у маршрутцы будзе каштаваць чатыры рублі, пішуць «Мінск-Навіны».
Адпаведныя органы вывучылі, ці абгрунтавана павялічылася цана праезду. Бо цэны на маршрутнае таксі ў горадзе рэгулююцца, а рэнтабельнасць перавозак не павінна перавышаць 15%.
— У рамках правядзення маніторынгу павелічэння тарыфу на праезд у маршрутцы 1183 выяўлены неабгрунтаваныя павелічэнні па артыкулах выдаткаў. З 4 сакавіка кошт маршруткі зніжаны з 5 да 4 рублёў. Па выніках пяці месяцаў гэтага года дадаткова будуць прааналізаваны артыкулы выдаткаў па прадстаўленай плановай калькуляцыі, — расказала намеснік старшыні камітэта эканомікі Мігарвыканкама Вольга Лявошка.
Яна звярнула ўвагу на тое, чаму пасажыры абавязаны аплаціць паездку і мець пры сабе чэк, які пацвярджае факт разліку за праезд.
У Мінску працуюць больш за 60 прыватных перавозчыкаў, якія абслугоўваюць паўсотні маршрутаў. Калі кіроўцы акажуцца несумленнымі і будуць браць наяўныя ад людзей, але не будуць выдаваць чэкі, такая сітуацыя можа прывесці да таго, што маршрут для перавозчыка стане стратным, а гэта можа скончыцца павышэннем кошту праезду.
Каментары