Суднаходства ў Армузскім праліве амаль спынілася, але кітайцы спрабуюць дамовіцца
З-за вайны паміж ЗША, Ізраілем і Іранам суднаходства ў Армузскім праліве амаль спынілася. У самім праліве і ў суседніх водах Персідскага і Аманскага заліваў затрымаліся каля двухсот нафтавых танкераў і сотні іншых суднаў.
Іран папярэдзіў, што любое судна, якое паспрабуе прайсці праз праліў, можа стаць цэллю для ўдару. Нават тыя, каго гэта не спалохала, сутыкнуліся з рэзкім ростам кошту страхавання. Акрамя таго, у рэгіёне дрэнна працуюць GPS-навігацыя і сувязь.
Звычайна праз Армузскі праліў штодня праходзіць больш за сто суднаў, у тым ліку каля сарака—пяцідзесяці танкераў з нафтай. Аднак у першыя месяцы 2026 года паток зменшыўся да некалькіх дзясяткаў у дзень, а ў першы тыдзень сакавіка, калі пачалася вайна, праз праліў праходзіла не больш за чатыры судны за суткі.
Большасць суднаў, якія затрымаліся, стаяць у партах або на рэйдзе і пастаянна рызыкуюць трапіць пад абстрэл. У такім становішчы апынуліся некалькі тысяч маракоў. Паведамляецца, што ўжо адбыліся напады на як мінімум дзевяць суднаў, і не менш за тры чалавекі загінулі. Эвакуяваць маракоў вельмі складана: судны нельга пакідаць без нагляду, бо многія з іх загружаныя нафтай, што можа прывесці да аварый і разліваў. Да таго ж у рэгіёне амаль спыніліся і авіязносіны.
Праз гэты праліў праходзіць каля чвэрці сусветных паставак нафты. Спыненне руху ўжо выклікала рост цэн на нафту прыкладна на 20 працэнтаў менш чым за тыдзень. Існуе рызыка парушэння сусветных ланцужкоў паставак, праблем з энергазабеспячэннем і вялікіх страт для сусветнай эканомікі.
Як паведамляе Reuters, Кітай спрабуе дамовіцца з Іранам, каб прапускаць некаторыя судны, якія вязуць нафту і звадкаваны газ у кітайскія парты. Кітай з’яўляецца адным з галоўных гандлёвых партнёраў Ірана, і таму амаль палова нафты, якую атрымлівае Кітай, праходзіць менавіта праз Армузскі праліў.
Паведамляецца, што адзін танкер змог прайсці ноччу пасля таго, як у сістэме адсочвання суднаў з’явілася інфармацыя, што ён належыць кітайскаму ўладальніку. Увогуле з пачатку вайны праліў перасякаюць галоўным чынам іранскія і кітайскія судны.
Некаторым іншым таксама ўдалося прайсці. Напрыклад, прынамсі пяць танкераў грэчаскай кампаніі Dynacom прайшлі праз праліў, адключыўшы транспондары, якія перадаюць звесткі пра месцазнаходжанне і ідэнтыфікацыю судна, піша Financial Times.
Кошт фрахту танкераў, якія выходзяць з Персідскага заліва, з пачатку вайны вырас больш чым у два разы. Паводле ацэнак аналітыкаў, адзін вялікі танкер, які плыве ў Кітай, можа прыносіць каля паўмільёна даляраў даходу ў дзень, не ўлічваючы выдаткаў на страхаванне ваенных рызык.
Уладальнік Dynacom Георгіас Пракопіу — адзін з найбуйнейшых суднаўладальнікаў у свеце. Яму належыць больш за 150 суднаў, а яшчэ дзясяткі будуюцца. Ён вядомы гатоўнасцю рызыкаваць. Раней яго кампанія актыўна перавозіла расійскую нафту пасля пачатку поўнамаштабнай вайны Расіі супраць Украіны, фармальна выконваючы санкцыі, але атрымліваючы вельмі высокую плату за свае паслугі. Украінскія ўлады абвінавачвалі кампанію ў фінансавай падтрымцы вайны.
Хто трапіў у іранскую школу па суседстве з базай КВІР? Вось што пра трагедыю кажуць эксперты
Міністр энергетыкі Катара: Цэны на нафту могуць узляцець да $150 за бараль на працягу двух-трох тыдняў
Іран абвясціў пра забарону руху праз Армузскі праліў
Трамп заявіў, што вайскоўцы ЗША могуць пачаць суправаджаць танкеры ў Армузскім праліве
Кітай запатрабаваў ад Ірана не перашкаджаць пастаўкам катарскага звадкаванага прыроднага газу
«Узнікаюць уяўленні, што палітвязні мусяць быць стойкімі, сабранымі, удзячнымі. А рэальнасць розная». Пагаварылі з людзьмі, якія водзяць дэпартаваных літаральна за руку66
Каментары