Сям’я Вані Сцяцэнкі, які праходзіў рэабілітацыю ў Дубаі, тэрмінова вярнулася дамоў
Хлопчык не паспеў прайсці рэабілітацыю з-за сітуацыі ў Персідскім заліве.
Гродзенец Ваня Сцяцэнка, якому збіралі грошы на лячэнне ад міядыстрафіі Дзюшэна, атрымаў неабходны прэпарат у Дубаі, аднак не змог цалкам прайсці там рэабілітацыю — сям’я была вымушаная вярнуцца дамоў. Бацькі хлопчыка вырашылі, што заставацца ў Эміратах небяспечна. Пра ад’езд мама Вані Аляксандра распавяла ў інстаграме:
«Мы пакінулі ўсё і зляцелі. Аб адзінаццатай гадзіне вечара мы выпадкова даведаліся пра адмену нашага рэйсу на 26 сакавіка. 11 сакавіка апошні вывазны і адмена ўсіх палётаў да канца сакавіка. Спантаннае рашэнне, мяняем квіток і злятаем, апошнія 5 квіткоў, кошт у 2 разы большы, але нам мяняюць без даплаты. <…>. Ванька і так напужаны пасля гіпсу, аслабеў + перыядычныя выбухі».
Жанчына таксама зазначыла, што да апошняга сумнявалася ў правільнасці рашэння ляцець, бо Ваня так і не прайшоў рэабілітацыю, якая была яму прызначаная. Каля аэрапорта ўпалі дроны, пасажыраў эвакуявалі ў падвал, самалёт затрымалі на тры гадзіны, давялося даплаціць за валізкі і гатэль.
Сям’я Сцяцэнка прыляцела ў Дубай у снежні 2025 года. У мясцовай клініцы ў лютым 2026 года Вані ўвялі неабходны прэпарат Elevidys, які каштаваў 2,9 мільёны даляраў.
Раней Аляксандра Сцяцэнка расказвала, што пасля ўдараў 1 сакавіка ў клініцы на дзень адмянілі прыём для бяспекі маленькіх пацыентаў. Зараз, па яе словах, усё ціха, але сёння ўначы ўсё ж прыходзілі трывожныя (і вельмі гучныя) апавяшчэнні на тэлефоны.
«Проста зараз ціха. Але нервова, — расказвала беларуска. — Чытала ў навінах, што сёння ў прамысловым раёне Фуджэйры быў нафтавы пажар праз абломкі дрона, але быццам бы пацярпелых няма. Не ведаю, ці патушылі ўжо. У нас тут, вядома, нічога не было чуваць, гэта больш за 200 кіламетраў адлегласць.
Затое мы пад канец адпачынку даведаліся, што ў Эміратах няма сховішчаў, наогул. Лепш бы і далей жылі без гэтых ведаў. У якасці сховішча — падземныя паркоўкі або метро, ці проста калі абвяшчаюць трывогу, кажуць заставацца ў гатэлі. Ну, мы і сядзім. Крамы і рэстараны працуюць як звычайна».
Нагадаем, што са зборам быў звязаны скандал — па падазрэнні ў махлярстве былі затрыманыя два блогеры — Міхаіл Драгун і Яўгенія Тарасенка, якія выклікаліся дапамагчы і таксама пачалі збіраць грошы. З сабраных 1,5 мільёнаў рублёў маме хлопчыка яны аддалі 200 тысячаў. Каля мільёну рублёў патрацілі на сябе. Супраць блогераў распачатая крымінальная справа. Суму, якой не хапала, пакрылі за кошт сродкаў блогераў.
Другі вайсковец, які загінуў пры аварыі МАЗа пад Асіповічамі — 21‑гадовы тэнісіст з Віцебска1
Каментары
[Зрэдагавана]