Siamja Vani Ściacenki, jaki prachodziŭ reabilitacyju ŭ Dubai, terminova viarnułasia damoŭ

Hrodzieniec Vania Ściacenka, jakomu źbirali hrošy na lačeńnie ad mijadystrafii Dziušena, atrymaŭ nieabchodny preparat u Dubai, adnak nie zmoh całkam prajści tam reabilitacyju — siamja była vymušanaja viarnucca damoŭ. Baćki chłopčyka vyrašyli, što zastavacca ŭ Emiratach niebiaśpiečna. Pra adjezd mama Vani Alaksandra raspaviała ŭ instahramie:

«My pakinuli ŭsio i źlacieli. Ab adzinaccataj hadzinie viečara my vypadkova daviedalisia pra admienu našaha rejsu na 26 sakavika. 11 sakavika apošni vyvazny i admiena ŭsich palotaŭ da kanca sakavika. Spantannaje rašeńnie, mianiajem kvitok i źlatajem, apošnija 5 kvitkoŭ, košt u 2 razy bolšy, ale nam mianiajuć biez dapłaty. <…>. Vańka i tak napužany paśla hipsu, asłabieŭ + pieryjadyčnyja vybuchi».

Žančyna taksama zaznačyła, što da apošniaha sumniavałasia ŭ pravilnaści rašeńnia lacieć, bo Vania tak i nie prajšoŭ reabilitacyju, jakaja była jamu pryznačanaja. Kala aeraporta ŭpali drony, pasažyraŭ evakujavali ŭ padvał, samalot zatrymali na try hadziny, daviałosia dapłacić za valizki i hatel.

Siamja Ściacenka prylacieła ŭ Dubaj u śniežni 2025 hoda. U miascovaj klinicy ŭ lutym 2026 hoda Vani ŭviali nieabchodny preparat Elevidys, jaki kaštavaŭ 2,9 miljony dalaraŭ.

Raniej Alaksandra Ściacenka raskazvała, što paśla ŭdaraŭ 1 sakavika ŭ klinicy na dzień admianili pryjom dla biaśpieki maleńkich pacyjentaŭ. Zaraz, pa jaje słovach, usio cicha, ale siońnia ŭnačy ŭsio ž prychodzili tryvožnyja (i vielmi hučnyja) apaviaščeńni na telefony.

«Prosta zaraz cicha. Ale niervova, — raskazvała biełaruska. — Čytała ŭ navinach, što siońnia ŭ pramysłovym rajonie Fudžejry byŭ naftavy pažar praz abłomki drona, ale byccam by paciarpiełych niama. Nie viedaju, ci patušyli ŭžo. U nas tut, viadoma, ničoha nie było čuvać, heta bolš za 200 kiłamietraŭ adlehłaść.

Zatoje my pad kaniec adpačynku daviedalisia, što ŭ Emiratach niama schoviščaŭ, naohuł. Lepš by i dalej žyli biez hetych viedaŭ. U jakaści schovišča — padziemnyja parkoŭki abo mietro, ci prosta kali abviaščajuć tryvohu, kažuć zastavacca ŭ hateli. Nu, my i siadzim. Kramy i restarany pracujuć jak zvyčajna».

Nahadajem, što sa zboram byŭ źviazany skandał — pa padazreńni ŭ machlarstvie byli zatrymanyja dva błohiery — Michaił Drahun i Jaŭhienija Tarasienka, jakija vyklikalisia dapamahčy i taksama pačali źbirać hrošy. Z sabranych 1,5 miljonaŭ rubloŭ mamie chłopčyka jany addali 200 tysiačaŭ. Kala miljonu rubloŭ patracili na siabie. Suprać błohieraŭ raspačataja kryminalnaja sprava. Sumu, jakoj nie chapała, pakryli za košt srodkaŭ błohieraŭ.

• 0
• 1
• 0
• 1
• 0
• 5
• 0
• 0