«Хто-небудзь у курсе, што гэта значыць?» У пункце пропуску «Тарэспаль» памежнік перакрэсліў штамп у беларускім пашпарце
Польскі памежнік паставіў штамп у пашпарт, а потым перакрэсліў яго вугал дзвюма палоскамі і паставіў новы. Беларусы патлумачылі, што гэта значыць, піша BGmedia.
«Хто-небудзь у курсе, што гэта значыць?» — напісала Настасся ў Threads. Яна апублікавала фота старонкі свайго пашпарта. На ёй дзве аднолькавыя пячаткі, якія ёй паставіў польскі памежнік. На адной з іх дзве рысы, што перакрэсліваюць штамп. Яны размяшчаюцца ў верхнім левым вугле.
Пад допісам больш за 120 каментарыяў. Беларусы патлумачылі дзяўчыне значэнне гэтых штампаў:
- «Так адзначаюць адмену штампа. Мяркуючы па вашай карцінцы, убачылі, што першы нечытэльны, адмянілі і праштампавалі нанова, каб усё чыталася».
- «Перакрэслілі пячатку, бо [яна] невыразна пастаўленая. Было не відаць, «уезд» ці «выезд» [яны на пячатцы паказаны стрэлкамі], і пункт пропуску не відаць».
- «Мне таксама так перакрэслівалі. Гэта нармальна».
- «Мяне захапляе гэтая прастата палякаў у плане афармлення дакументаў. Памыліўся? Перакрэсліваеш радок, пішаш правільна — і няма праблем. Пасля Беларусі, дзе са школьнай лавы зніжалі адзнакі за выпраўленні, нават губляешся першы час».
У практычным кіраўніцтве для памежнікаў, якія працуюць у Шэнгенскай зоне, напісана, што бываюць сітуацыі, калі штамп трэба ануляваць. Напрыклад, з-за таго, што яго паставілі памылкова. Або, як у выпадку з Настассяй, невыразна. Каб гэта зрабіць, у левым верхнім куце пячаткі рэкамендуюць правесці дзве паралельныя лініі.
Беларусы распавялі, чаму ім перакрэслівалі штампы ў пашпартах
Пад постам беларусы падзяліліся гісторыямі, як і чаму ім перакрэслівалі штампы. Аказалася, што гэта здараецца не толькі на мяжы:
- «Я спазніўся на перасадку і вырашыў выйсці ў горад, мне таксама перакрэслілі штамп выезду, на наступны дзень паставілі зноў».
- «У мяне даўным-даўно нашы памежнікі так выпраўлялі. На аўтапераходзе раздалі пашпарты. Потым чамусьці зноў сабралі. Калі выдалі паўторна, то першая пячатка была ануляваная, бо ў ёй стаяла дата 38 верасня».
- «У мяне ў пашпарце няправільна паставілі візу, перакрэслілі велізарным крыжыкам і паставілі новую. Я думала, што ўсё, пашпарту канец».
- «Мне ў снежні больш пашанцавала. Дзве мілыя літоўскія памежніцы пяць хвілін бедавалі, выбачаліся і раіліся з-за невыразнага штампа, дзе не чыталася дата выезду. І ўжо адпусцілі, але ўслед папрасілі вярнуцца, узялі пашпарт і, перакрэсліўшы крывы штамп, акуратна зрабілі новы».
- «У нас таксама крэсляць [чыноўнікі]. Мне штамп аб прапісцы перакрэслівалі і ставілі ніжэй новы (прапісалі не тую вуліцу, замест Пляханава — праспект Ракасоўскага). Я смяялася, сказала, што прыйду туды засяляцца».
«А мне на турэцкай мяжы такую [пячатку паставілі]. Развод забаронены!» — пажартавала беларуска. Яна прымацавала фота старонкі з пашпарта, дзе пад штампам аб заключэнні шлюбу стаяць адзнакі аб перасячэнні турэцкай мяжы.
Цяпер чытаюць
Музыка, маляванне і танцы ў школах і гімназіях — усё? Што вядома пра скарачэнні настаўнікаў-эстэтыстаў6
Музыка, маляванне і танцы ў школах і гімназіях — усё? Што вядома пра скарачэнні настаўнікаў-эстэтыстаў
«Калі б я быў следчым КДБ, я б падкрэсліў тое самае». Фядута — пра схаваныя сэнсы «Каласоў пад сярпом тваім», увагу сілавікоў да свайго рукапісу і загадку з трэцяй часткай рамана Караткевіча1313
Каментары