Сустрэча лідараў Вялікабрытаніі, Францыі, Германіі і Украіны ў Лондане завяршылася гучнай сумеснай заявай. Фрыдрых Мерц, Кір Стармер, Эмануэль Макрон і Уладзімір Зяленскі дакладна акрэслілі: Еўропа павінна браць «актыўны ўдзел» у любых будучых перамовах паміж Кіевам і Масквой, а сам трывалы мір магчымы толькі пры выкананні пяці цвёрдых умоў.
Сумесная заява была апублікаваная на сайце брытанскага ўрада ў нядзелю, 7 чэрвеня 2026 года.
Падчас сустрэчы абмяркоўвалася ўзмацненне ціску на расійскую эканоміку, павелічэнне ваеннай дапамогі Украіне, а таксама супольная вытворчасць ракет для супрацьпаветранай абароны і дальнабойных удараў.
Пяць умоў для трывалага міру ва Украіне
Лідары «еўратройкі» і Зяленскі вызначылі пяць умоў для дасягнення справядлівага і трывалага міру.
Спыненне баявых дзеянняў.
Цяперашняя лінія сутыкнення павінна стаць зыходным пунктам для перамоў. Пры гэтым міжнародныя межы не павінны змяняцца сілай, а суверэннае права Украіны самастойна выбіраць саюзы і механізмы бяспекі павінна няўхільна выконвацца.
Абавязковыя гарантыі бяспекі. Пасля ўступлення ў сілу рэжыму спынення агню Украіна павінна атрымаць гарантыі бяспекі, якія ўключаюць разгортванне шматнацыянальных сіл на яе тэрыторыі.
Замарозка расійскіх актываў. Яны застануцца заблакаванымі да таго часу, пакуль Расія не спыніць агрэсіўную вайну і не кампенсуе страты, нанесеныя Украіне.
Абарона інтарэсаў еўрапейскай бяспекі. Любыя дамоўленасці павінны гарантаваць бяспеку Еўропы, а частка перамоў, якая тычыцца ЕС і НАТА, запатрабуе згоды краін-членаў гэтых арганізацый.
Прапанова Зяленскага Пуціну і адказ Крамля
Увечары 4 чэрвеня Уладзімір Зяленскі апублікаваў адкрыты ліст да Уладзіміра Пуціна з прапановай вызначыць дакладную дату асабістай сустрэчы для заканчэння вайны, адзначыўшы, што да працэсу могуць далучыцца Еўропа і ЗША.
Ужо на наступны дзень Пуцін заявіў, што пакуль не бачыць сэнс у такой сустрэчы, назваў ліст «хамскім» і заклікаў расійскіх вайскоўцаў працягваць баявыя дзеянні да «дасягнення пастаўленых мэт».
Цяпер чытаюць
Пальчыс: Я супраць дапамогі тым палітвязням, хто ў зняволенні працаваў на адміністрацыю2
Каментары
Па логіцы спачатку трэба было выставіць умовы для міру і правесці перамовы.
А якія перамовы пасля адмовы ад перамоў аднаго боку? І якія 5 умоў для міру, калі перамоў не будзе?
Усё з ног на галаву паставілі.