У Вялікабрытаніі плануюць забараніць карыстанне сацыяльнымі сеткамі для дзяцей да 16 гадоў. Пра гэта абвясціў прэм’ер-міністр краіны Кір Стармер. Новыя абмежаванні могуць уступіць у сілу ўжо наступнай вясной, паведамляе The Guardian.
Паводле палажэнняў новага закона, падлеткам маладзейшым за 16 гадоў забароняць спампоўваць і выкарыстоўваць асноўныя сацыяльныя платформы, у тым ліку Facebook, Instagram, YouTube, Snapchat, TikTok і X. Таксама будуць уведзеныя дадатковыя абмежаванні для анлайн-гульняў — напрыклад, забарона на камунікацыю з незнаёмымі людзьмі, а для асоб да 18 гадоў будзе забаронена карыстанне чат-ботамі, якія імітуюць рамантычныя або сэксуальныя адносіны.
Кампаніі Meta, YouTube і Snapchat раскрытыкавалі ініцыятыву. Яны сцвярджаюць, што поўная забарона можа адштурхнуць падлеткаў ад больш бяспечных і кантраляваных сэрвісаў і прымусіць іх перайсці на менш надзейныя і нерэгуляваныя пляцоўкі.
Кір Стармер заявіў, што сацыяльныя сеткі могуць негатыўна ўплываць на псіхічнае здароўе дзяцей, спрыяць здзекам і інтэрнэт-цкаванню. Пры гэтым ён падкрэсліў, што ўрад не выступае супраць тэхналогій і штучнага інтэлекту, але лічыць абарону дзяцей галоўным прыярытэтам.
Паводле слоў брытанскага прэм’ера, нават калі частка падлеткаў знойдзе спосабы абысці забарону, гэта не азначае, што ад яе трэба адмовіцца. Ён параўнаў сітуацыю з забаронай продажу алкаголю непаўналетнім: парушэнні правілаў не адмяняюць неабходнасць саміх правіл.
Ініцыятыву падтрымалі многія бацькі і грамадскія актывісты, у тым ліку сем’і, якія лічаць, што сацыяльныя сеткі адыгралі ролю ў трагедыях з іх дзецьмі. Урад Вялікабрытаніі паведаміў, што каля дзевяці з дзесяці бацькоў, якія ўдзельнічалі ў грамадскім абмеркаванні, падтрымалі ўстанаўленне мінімальнага ўзросту ў 16 гадоў для доступу да такіх сэрвісаў.
З'явіцца платны Інстаграм — з ананімным праглядам сторыз і схаванымі публікацыямі
Галоўны ідэолаг расказаў, ці будуць у Беларусі забараняць дзецям і падлеткам карыстацца сацсеткамі
Колькі сяброў можа быць у чалавека ў эпоху сацсетак? Навуковец падлічыў
Instagram робіць вас найгоршым турыстам? Вось як падарожнічаць з павагай
Каментары