Гэтыя лічбы сведчаць пра тое, як выраслі магчымасці Украіны, якая ў пачатку вайны не магла параўнацца з Расіяй па інтэнсіўнасці ўдараў па тылах саперніка.
Расійскае Мінабароны паведаміла, што за суткі сілы СПА збілі 992 украінскія беспілотнікі самалётнага тыпу, чатыры крылатыя ракеты вялікай дальнасці і дзесяць кіраваных авіябомбаў. Гэты ўдар не толькі пабіў папярэдні ўкраінскі рэкорд па колькасці выкарыстаных за суткі дронаў, але і перавысіў максімальную колькасць БПЛА, якую за суткі выпускала Расія, піша «Агентство».
Расійскае Мінабароны паведамляе толькі пра збітыя беспілотнікі, што дазваляе выказаць здагадку, што насамрэч дронаў было больш.
Папярэдні рэкордны ўдар Украіны быў зафіксаваны 6 чэрвеня. Тады расійскае Мінабароны паведамляла пра паражэнне 911 дронаў, 13 авіябомбаў і чатырох снарадаў HIMARS.
Найбуйнейшы за вайну расійскі ўдар па Украіне адбыўся 24 сакавіка. Тады за суткі сумарна Расія атакавала Украіну 948 дронамі.
Што гэта значыць?
Гэтыя лічбы дэманструюць рост магчымасцяў Украіны. Першыя гады вайны УСУ не маглі параўнацца з расійскай арміяй па інтэнсіўнасці ўдараў углыб тэрыторыі.
Пералом адбыўся сёлета. У сакавіку колькасць выкарыстаных Украінай дронаў па выніках месяца перавысіла колькасць БПЛА, запушчаных Расіяй.
Тады, паводле звестак украінскага маніторынгавага канала «Око Гора», Расія запусціла 6462 БПЛА па Украіне. УСУ ж у сакавіку, паводле звестак расійскага Мінабароны, атакавалі Расію 7551 БПЛА.
У красавіку Расія запусціла больш дронаў, чым Украіна (6583 і 4801 адпаведна). Аднак у маі ўкраінскія ваенныя зноў перавысілі колькасць дронаў, запушчаных Расіяй (8973 і 8150 адпаведна).
Уладзімір Зяленскі назваў масіраваны ўдар па Маскве 18 чэрвеня «справядлівым адказам» на расійскія атакі.
Паводле яго слоў, Украіна не будзе «ціхенька сядзець», калі Расія працягне вайну: «Калі будзе гарэць Украіна, будзе гарэць і ваша Масква».
За некалькі гадзін да гэтага адбылася найбуйнейшая з пачатку вайны атака дронаў на Маскву. Украінскія беспілотнікі і іх абломкі пашкодзілі аб’екты як мінімум у 10 месцах сталічнага рэгіёна, пра што сведчаць заявы ўлад і апублікаваныя ў сацсетках відэа.
Удары дронаў па Маскоўскім НПЗ у Капотні, які стаў галоўнай мэтай налёту, прывялі да пажараў па меншай меры ў шасці месцах на тэрыторыі прадпрыемства, у тым ліку на асноўнай устаноўцы перапрацоўкі нафты, сведчыць аналіз «Агенцтва».
Уладзімір Пуцін з раніцы выступае на саміце АСЕАН у Казані, але так і не пракаментаваў украінскія ўдары.
Каментары
Дзякуй ЗСУ, ГУР, СБУ! Дзякуй Украіна🇺🇦