У Беларусі закрылі праект па ўстаноўцы «бутэлькаматаў». Гэта была ўжо не першая спроба
У Беларусі закрылі праект па ўстаноўцы «бутэлькаматаў». Гэтыя апараты, якія таксама называюць тараматамі ці фандаматамі, дазваляюць здаць пластыкавыя бутэлькі і алюмініевыя бляшанкі і атрымаць наўзамен кампенсацыю, часцей за ўсё ў выглядзе зніжкавых купонаў на пакупкі ў розных крамах, піша Blizko.by.
Паведамленне пра закрыццё праекта з'явілася ў дадатку EcoPlatform, гэтую экасістэму развівае расійская кампанія «Інавацыйная экалагічная платформа».
Паведамляецца, што фандаматы даводзіцца закрываць з-за росту выдаткаў і складанай лагістыкі.
За час працы ў Беларусі было сабрана больш за 10,5 мільёна бляшанак і бутэлек.
Нягледзячы на тое, што такім чынам тэарэтычна сапраўды можна было накапіць нямала зніжкавых рублёў, самі «бутэлькаматы» працавалі вельмі нестабільна: раз-пораз яны былі паламанымі або проста не працавалі. Акрамя таго, іх вельмі хутка запаўнялі, а разгружалі не так часта, як гэтага хацелася б карыстальнікам.
Урэшце, праграма проста паведамляла карыстальніку няслушныя лічбы, і калі той прыходзіў з поўнай сеткай да нібыта вольнага тарамата, то мог сутыкнуцца з тым, што той перапоўнены ці заблакаваны. З 12‑ці мінскіх тараматаў адначасова маглі быць нядзейнымі адразу палова ці нават больш.
У дадатку ёсць сістэма рэйтынгаў, якая паказвае, колькі бляшанак і бутэлек здалі праз розныя бутэлькаматы. У Мінску рэкорд устанавіў нехта Ў з неверагодным паказчыкам 92 280 бляшанак і бутэлек.
Але гэта не адзіная ініцыятыва па прыёме ў насельніцтва пластыкавых бутэлек. Blizko.by расказваў: яшчэ ў сакавіку 2020‑га пастаянны тарамат з'явіўся ў гіпермаркеце Green у гандлёвым цэнтры «Скала» на рагу вуліц Прытыцкага і Петруся Глебкі. Гэта быў сумесны праект «Аліварыі» і сеткі Green.
Дарэчы, яшчэ ў 2019 годзе ў краіне павінна была запрацаваць агульнарэспубліканская дэпазітна-залогавая сістэма з тараматамі па ўсёй Беларусі, якія б прымалі бляшанкі і бутэлькі па фіксаванай цане (арыенціровачна 20 капеек). Пасля ўкараненне сістэмы адклалі на 2021 год, пасля на 2024-й, а потым і зусім вырашылі адкласці яе ў вельмі далёкую шуфляду. Цяпер прыблізныя тэрміны запуску сістэмы — аж 2035‑ы (!!!) год. Прычым без ніякіх гарантый, вядома ж.
Цяпер чытаюць
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка4
Каментары