У ЗША з міграцыйнай турмы вызвалілі беларуску, у якой быў рак шчытападобнай залозы
Міграцыйная і мытная служба ЗША вызваліла грамадзянку Беларусі Кацярыну Бартко, якая папрасіла прытулак.
Яна ўтрымлівалася ў цэнтры ў Лівенворце, штат Канзас. Пра гэта паведамляе Reform.news са спасылкай на тэлеканал FOX4.
Кацярына Бартко вызваленая ў сувязі з пагаршэннем стану здароўя. Раней тэлеканал распавядаў пра яе справу.
Паводле яго інфармацыі, Бартко перанесла рак. Ёй зрабілі аперацыю па выдаленні шчытападобнай залозы, і цяпер яна штодня прымае лекі. Яна прыехала ў ЗША ў 2022 годзе па студэнцкай візе і падала заяву на атрыманне прытулку, спасылаючыся на пераслед з боку беларускіх уладаў.
Яна ўтрымлівалася ў цэнтры ICE CoreCivic. На выходных яе стан здароўя настолькі пагоршыўся, што жанчыну давялося шпіталізаваць. Цяпер яна праходзіць лячэнне ў бальніцы Універсітэта Канзаса.
Пасля завяршэння лячэння яна зможа вярнуцца ў Маямі пры ўмове выкарыстання GPS-маніторынгу. Судовае разбіральніцтва па іміграцыйнай справе павінна адбыцца ў канцы месяца.
Гісторыя затрымання Кацярыны нагадвала абсурдны фільм. Усё пачалося 6 мая 2026 года са сваркі на вечарыне. Пара гучна пасварылася ўначы з іншымі гасцямі і сышла, але нехта выклікаў паліцыю.
«У Фларыдзе па такіх выкліках затрыманне аўтаматычнае, да высвятлення абставінаў — такі парадак. Дэтэктыў мне сказаў, што не бачыць складу злачынства і закрые справу. Але ў штаце Фларыда — гэта ледзь не адзіны такі штат у ЗША — штат усё адно можа даць справе ход, калі палічыць патрэбным. Што ён і зрабіў», — расказваў яе хлопец Дзмітрый Шышоў.
Кацярыну ўзялі пад варту, праз нейкі час суд справу закрыў, але Кацярыну не адпусцілі, а перавялі ў іміграцыйную турму толькі на падставе новага жорсткага цыркуляра супраць людзей з пратэрмінаванымі візамі.
Цяпер чытаюць
У расійскай арміі беларускага наёмніка павесілі на дрэве ўніз галавой і білі палкай па геніталіях17
Каментары