Сі Дзіньпін прыбыў у ЗША з трохдзённым візітам, Трамп асабіста сустрэў яго ў аэрапорце
Лётным полем маршавым крокам прайшоў аркестр ВПС ЗША, а таксама луналі амерыканскі і кітайскі сцягі.
Прэзідэнт ЗША Дональд Трамп вітаў свайго кітайскага калегу Сі Дзіньпіна пралётам бамбавікоў і 30‑метровай чырвонай дарожкай напярэдадні пачатку іх трохдзённага саміту ў Вашынгтоне. Трамп асабіста сустрэў старшыню КНР у аэрапорце, дзе па лётным полі маршавым крокам прайшоў аркестр ВПС ЗША, а таксама луналі амерыканскі і кітайскі сцягі, піша Бі-бі-сі.
Прэзідэнт ЗША і першая лэдзі Меланія Трамп віталі Сі і яго жонку Пэн Ліюань на аб'яднанай базе Эндрус у штаце Мэрыленд у сераду ўвечары.
Чакаецца, што першая паездка Сі ў Вашынгтон з 2015 года будзе ўключаць закрытыя сустрэчы, дзяржаўную вячэру і шырокае кола пытанняў для абмеркавання — ад штучнага інтэлекту да вайны з Іранам і Тайваня, а таксама падаўжэння гандлёвага перамір'я.
Лідар Камуністычнай партыі Кітая прызямліўся на самалёце Air China ў 17:39 па мясцовым часе (00:39 па Мінску). Ганаровая варта падышла да самалёта і выстраілася па абодва бакі чырвонай дарожкі, калі да трапа пад'ехалі два лімузіны.
Сі і Пэн пакінулі самалёт, пасля чаго дзве пары абмяняліся поціскамі рук. Яны коратка пагутарылі, а затым бок аб бок прайшлі па чырвонай дарожцы і пазіравалі для фатаграфій.
Два B-1 праляцелі над базай, пакуль аркестр выконваў дзяржаўны гімн ЗША. Гэтыя звышгукавыя самалёты з'яўляюцца важнай часткай амерыканскага баявога арсеналу.
Пасля абмену ветлівасцямі абедзве пары на асобных аўтамабілях адправіліся ў Вашынгтон.
Сустрэча замежнага лідара ў аэрапорце прэзідэнтам ЗША — першы такі выпадак за 11 гадоў.
Апошні раз так папу Францішка ў 2015 годзе ўшаноўваў Барак Абама. Да гэтага, у 1962 годзе, прэзідэнт Джон Кенэдзі сустракаў прэм'ер-міністра Вялікабрытаніі Гаральда Макмілана.
Міністр фінансаў ЗША Скот Бэсант ужо абвясціў, што ЗША і Кітай падоўжаць гандлёвае перамір'е да студзеня. Тэрмін дзеяння пагаднення, у межах якога Трамп знізіў тарыфы на некаторыя тавары ў абмен на змякчэнне Сі абмежаванняў на пастаўкі рэдказямельных мінералаў, павінен быў скончыцца 10 лістапада.
Бэсант, які выступіў пасля сустрэчы з віцэ-прэм'ерам Кітая Хэ Ліфэнам, паведаміў, што бакі таксама абмеркавалі магчымасць заключэння ў будучыні больш змястоўнага гандлёвага пагаднення.
У пісьмовай заяве, апублікаванай кітайскім дзяржаўным інфармацыйным агенцтвам «Сіньхуа», Сі заявіў, што і Кітай, і ЗША «вялікія дзяржавы, а іх народы — вялікія народы».
«Дзве краіны павінны быць партнёрамі, а не супернікамі», — сказаў ён.
Меланія Трамп заявіла, што непасрэдна ўдзельнічала ў планаванні праграмы візіту. У інтэрв'ю Fox News яна сказала, што Трамп вырашыў асабіста сустрэць Сі ў аэрапорце, «таму што ў іх выдатныя адносіны».
Сі суправаджаюць член Пастаяннага камітэта Палітбюро партыі Цай Ці, якога многія лічаць яго правай рукой, віцэ-прэм'ер Хэ Ліфэн, міністр замежных спраў Ван І, а таксама іншыя высокія чыноўнікі з Пекіна.
«Ажыццяўленне вялікага адраджэння кітайскай нацыі і адраджэнне велічы Амерыкі могуць цалкам суіснаваць, умацоўваць адно аднаго і прыносіць карысць свету», — гаворыцца ў заяве Сі, распаўсюджанай агенцтвам «Сіньхуа». У ёй ён таксама выказаў упэўненасць, што візіт «прынясе плённыя вынікі».
Невядома, ці прывёз Сі з сабой прадстаўнікоў бізнесу. Прысутнасць кітайскіх кампаній у ЗША таксама можа выклікаць пытанні наконт кітайскай дзелавой практыкі, субсідый і залішніх вытворчых магутнасцяў, а ўсё гэта здольнае прывесці да большай крытыкі і большай колькасці пытанняў, чым хацелася б Сі і яго партыі.
Падчас візіту Трампа ў Пекін у маі яго суправаджала група кіраўнікоў тэхналагічных кампаній з ліку найбуйнейшых амерыканскіх фірмаў, уключаючы Ціма Кука з Apple, Ілона Маска з Tesla і Джэнсена Хуанга з Nvidia.
Чакаецца, што кіраўнікі амерыканскіх кампаній, якія працуюць у сферы штучнага інтэлекту, наведаюць раскошную дзяржаўную вячэру, запланаваную на чацвер. Візіт Сі завершыцца ў пятніцу.
Трамп адкінуў нядаўнія папярэджанні прадстаўнікоў галіны аб патэнцыйных небяспеках штучнага інтэлекту, назваўшы іх «містыфікацыяй», у той час як абедзве краіны імкнуцца дамагчыся дамінавання ў гэтым сектары.
Каментары