Прызначэнне Муравейкі ў Адміністрацыю — гэта камбінацыя Лукашэнкі, сэнс якой пакуль незразумелы
Аляксандр Лукашэнка пайшоў на кадравыя перастаноўкі, якія здзівілі ўсіх, у тым ліку і саміх чыноўнікаў. Адыёзны генерал Павел Муравейка сёння быў нечакана прызначаны намеснікам кіраўніка Адміністрацыі прэзідэнта — на спецыяльна пад яго створаную пазіцыю, у абыход кіраўніка Адміністрацыі, Дзмітрыя Крутога.
Раней Муравейка займаў пасаду начальніка Генеральнага штаба Узброеных сіл і першага намесніка міністра абароны. Прычым перасадзілі на новую пасаду яго праз два дні пасля таго, як яму споўнілася 55 гадоў. Як толькі споўнілася, адразу і папёрлі, хоць энергіі ў гэтага генерала было хоць адбаўляй.
Такая ракіроўка стала сюрпрызам для ўсіх, бо генерал-маёр Павел Муравейка мае рэпутацыю цвердалобага нават па мерках цяперашняй сілавой вярхоўкі. А дасведчаны ў кулуарных чутках Павел Латушка называў яго прадстаўніком расійскага лобі ў беларускім сілавым блоку. Муравейка вучыўся ў Акадэміі Генштаба РФ, якую скончыў у 2008‑м з залатым медалём.
Звяртаў увагу гэты генерал сваімі заявамі. Напрыклад, ён казаў, што Беларусь мае права сілай прасекчы калідор праз Літву да мора. Гэтыя словы сілавіка прывялі да сапраўднага міжнароднага скандалу паміж Мінскам і Вільняй. Таксама Муравейка пагражаў суседнім краінам ядзернай зброяй і расказваў пра мільёны кібератак на Беларусь — поўную лухту.
У 2022‑м Муравейку перавялі на пасаду першага намесніка дзяржаўнага сакратара Рады бяспекі Беларусі, а ў 2024‑м і ўвогуле паставілі кіраваць Генштабам. Назіральнікі звярталі ўвагу, што адстаўка Віктара Гулевіча адбылася пасля вяртання Лукашэнкі з Масквы, а прызначэнне Муравейкі — у дзень візіту Пуціна ў Мінск.
Цяпер, як бачым, генерала перавялі ў Адміністрацыю. Прычым нібыта па асабістым жаданні непасрэдна Лукашэнкі, які падкрэслена заявіў, што гэта робіцца цераз галаву кіраўніка Адміністрацыі Дзмітрыя Крутога.
Загадка тут, чым канкрэтна будзе займацца Муравейка на пасадзе чыноўніка. Сам Лукашэнка адказвае на гэтае пытанне вось такі чынам: «Мне як прэзідэнту і галоўнакамандуючаму Узброенымі сіламі вельмі важна мець некалькі, калі хочаце, альтэрнатыўных пунктаў гледжання на сітуацыю ў нашых сілавых падраздзяленнях», — заўважыў ён.
Раней сілавыя структуры каардынавала Рада бяспекі. А цяпер што, у дадатак да яе будзе яшчэ намеснік кіраўніка Адміністрацыі? Якія яго функцыі тады?
Складваецца ўражанне, што Лукашэнка рыхтуе ў сілавым блоку нейкія перамены. Што гэта будзе, сказаць пакуль цяжка, але ж камбінацыя яўна распрацаваная і паціху будзе рэалізоўвацца. Пытанне — а што ж выклікала патрэбу ў гэтых пераменах? Банальнае жаданне абмаладзіць кадры і пры гэтым не стварыць уражання ў Масквы, што прарасійскага генерала адсунулі? Ці чыстка апарату ад занадта ўжо прарасійскіх генералаў? Ці гэта проста першы ход у руціннай ператасоўцы кадраў, каб ніхто не заседжваўся на адной пасадзе задоўга?
У Генштабе Муравейку сёння змяніў генерал-маёр Уладзімір Белы.
Ён зусім нядаўна, з 8 ліпеня гэтага года, працаваў намеснікам міністра абароны. Да таго Белы ўзначальваў галоўнае ўпраўленне баявой падрыхтоўкі Узброеных сілаў. У свой час Белы камандаваў гвардзейскай асобнай паветрана-дэсантнай брыгадай, і быў начальнікам штаба — першым намеснікам камандуючага Сіламі спецыяльных аперацый, а таксама камандуючым Заходнім аператыўным камандаваннем. У адрозненне ад Муравейкі, Уладзімір Белы ў Расіі не вучыўся — рэдкі для цяперашняга генералітэту выпадак, хутчэй, выключэнне.
«Беларусь перадусім». Што вядома пра 23‑гадовага афіцэра спецназа, якога асудзілі на 19 гадоў за «здраду дзяржаве»8
Каментары