Бойфрэнд з каталога — у Кітаі набірае папулярнасць новая паслуга

Як піша South China Morning Post, у кітайскіх сацсетках набірае папулярнасць незвычайная паслуга: жанчыны наймаюць мужчын-мадэляў, каб сфатаграфавацца з імі як з сапраўднымі партнёрамі. Гэта не проста сумесны здымак — на час фотасесіі разыгрываецца маленькая гісторыя рамантычных адносін.

Кліентка можа трымаць мужчыну за руку, абдымацца з ім, імітаваць пацалунак ці дакранацца да яго прэса. Фатограф пры гэтым кіруе працэсам і падказвае, як стварыць у кадры ўражанне блізкасці паміж парай.

Каштуе такое задавальненне нямала. Гадзінная фотасесія можа абысціся ў 8000 юаняў, што прыкладна адпавядае 1100 далярам. Можна замовіць сесію на 30 хвілін і запрасіць трэцяга ўдзельніка.

З'явіліся ўжо і спецыялізаваныя студыі. Так студыя Mujiao ў Нанкіне называе сябе першай у Кітаі, якая пачала прапаноўваць парныя фотасесіі з мужчынамі-мадэлямі. Самы танны пакет там каштуе каля 1000 даляраў і ўключае дзевяць апрацаваных фатаграфій. Самы дарагі — каля 3900 даляраў. За гэтыя грошы кліентка атрымлівае цэлы дзень у вобразе пары з некалькімі камплектамі адзення і 120 фатаграфіямі.

Кліенткам прапануюць каталог мужчын, дзе можна падабраць сабе партнёра па знешнасці, росту і іншых параметрах. Кошт залежыць не толькі ад выгляду мадэлі, але і ад яго папулярнасці ў сацсетках і ўмення паводзіць сябе перад камерай.

Некаторыя кліенткі прыходзяць са сваімі сцэнарамі. Яны могуць папрасіць разыграць пэўную сцэну з рамана ці комікса альбо цэлую гісторыю. Напрыклад, сварку пары і наступнае прымірэнне. Студыі прапануюць і гатовыя вобразы: ад нявіннай студэнцкай закаханасці да больш пачуццёвых фотасесій.

Матывы ў жанчын розныя. Адным патрэбныя прыгожыя фатаграфіі для сацсетак, другія хочуць ненадоўга адчуць сябе ў рамантычных адносінах. Некаторыя жанчыны звяртаюцца па такую паслугу, бо маюць мала досведу сапраўдных рамантычных адносін і хочуць перажыць хаця б іх імітацыю. Іншыя прыходзяць пасля разрыву.

Ёсць і тыя, хто выкарыстоўвае атрыманыя фатаграфіі, каб паказаць сям'і нібыта бойфрэнда і пазбегнуць ціску з патрабаваннямі хутчэй выйсці замуж. Пры гэтым сярод кліентак ёсць не толькі адзінокія жанчыны. Паводле прадстаўнікоў гэтага бізнэсу, паслугай карыстаюцца і жанчыны, якія ўжо маюць партнёраў або замужам.

Рынак платных кампаньёнаў

Фотасесіі з «бойфрэндам» — толькі адна з праяў значна шырэйшай з'явы, якая ў Кітаі атрымала назву «рынак платных кампаньёнаў». Чалавек плаціць ужо не столькі за рэч ці канкрэтную паслугу, колькі за прысутнасць іншага чалавека, увагу і тое, што ў Кітаі часта называюць «эмацыйнай каштоўнасцю».

Так, за грошы можна знайсці чалавека, які сходзіць з табой у рэстаран, пабегае або паедзе на экскурсію. Такія паслугі часта прапануюць студэнты і маладыя людзі, якія шукаюць дадатковы заробак.

Асабліва папулярнымі сталі «кампаньёны для паходаў». За некалькі сотняў юаняў малады чалавек можа пайсці разам з кліенткай у горы, несці рэчы, падаваць ваду, фатаграфаваць і падтрымліваць, калі тая стамілася.

Яшчэ далей гэтая мадэль зайшла ў папулярных у Кітаі ролевых гульнях. У іх удзельнікі атрымліваюць персанажаў і некалькі гадзін разыгрываюць загадзя напісаную гісторыю.

У рамантычнай версіі такой гульні жанчына можа заплаціць мужчыну-вядучаму, які на некалькі гадзін становіцца яе каханым паводле сцэнарыя. Ён прызнаецца ёй у пачуццях, падтрымлівае яе, можа трымаць за руку ці абдымаць. Асабліва папулярныя гісторыі, пабудаваныя вакол ідэі безумоўнай адданасці: мужчынскі персанаж пры любых абставінах застаецца на баку гераіні.

Павялічыць

Як адзначаюць даследчыкі, папулярнасць падобных паслуг расце на фоне прыкметных змен у асабістым жыцці маладых кітайцаў. Людзі пазней уступаюць у шлюб, а саміх шлюбаў у краіне ў апошнія гады стала значна менш. Адначасова ўсё больш людзей жывуць адны. Гэта стварае попыт на паслугі, якія дазваляюць атрымаць кампанію і эмацыйную блізкасць без доўгатэрміновых адносін.

І пакуль адны бачаць у гэтым новае поле для бізнэсу, іншыя папярэджваюць: калі блізкасць ператвараецца ў паслугу, будаваць рэальныя адносіны можа стаць яшчэ складаней.

• 2
• 0
• 1
• 6
• 1
• 0
• 0
• 0