12 студзеня ў Беларусі набылі моц папраўкі ў Кодэкс аб адміністрацыйных правапарушэннях, якія ўзмацняюць адказнасць за парушэнні шэрагу палажэнняў Правілаў дарожнага руху.
Як паведаміла старшы інспектар па асаблівых даручэннях упраўлення ДАІ МУС Ганна Банадык, парушэнне правілаў спынення або стаянкі транспартных сродкаў пацягне штраф у памеры 1 базавай велічыні (1 базавая велічыня — 35 тысяч рублёў), а паўторнае парушэнне на працягу года — 2 базавыя велічыні. Парушэнне правілаў спынення або стаянкі грузавога аўтамабіля з тэхнічна дапушчальнай агульнай масай больш чым 3,5 тоны абыдзецца кіроўцуў 5 базавых велічынь, а паўторнае парушэнне на працягу года — 10 базавых велічынь. Раней штраф быў адзіны для ўсіх — 1 базавая велічыня.
Штраф за кіраванне транспартным сродкам кіроўцам, не прышпіленым рэменем бяспекі, і за перавозку пасажыраў не прышпіленымі складзе да 1 базавай велічыні. Гэта палажэнне было і ў мінулай рэдакцыі КоАП. Навіна заключаецца ва ўвядзенні штрафу за паўторнае парушэнне на працягу года — ад 2 да 5 базавых велічынь.
Парушэнне асобай, якая кіруе транспартным сродкам, правілаў карыстання радыё- і тэлефоннай сувяззю падчас руху пацягне за сабой
штраф у памеры ад 2 базавых велічынь.
Новым тут таксама з'яўляецца адказнасць за паўторнасць парушэння. Штраф — ад 2 да 8 базавых велічынь.
Новыя памеры штрафаў устаноўленыя за перавышэнне хуткасных рэжымаў. За перавышэнне ўстаноўленай хуткасці ад 20 да 30 км/гадз штраф складзе ад 1 да 3 базавых велічынь. Да 12 студзеня — ад 1 да 2 базавых велічынь.
Штраф за перавышэнне хуткасці на 30 км/гадз і больш — ад 3 да 10 базавых велічынь. Было — ад 2 да 10 базавых велічынь.
За паўторнае на працягу года перавышэнне хуткасці больш чым на 20 км/гадз і больш чым на 30 км/гадз штраф складзе ад 5 да 15 базавых велічынь. Да 12 студзеня — ад 4 да 15 базавых велічынь.
Невыкананне патрабаванняў сігналаў святлафора і рэгуліроўшчыка акрамя як на чыгуначным пераездзе або парушэнне правілаў праезду скрыжавання паўторна на працягу года пацягне штраф у памеры ад 3 да 10 базавых велічынь.
