«Хто баіцца Вірджыніі Вульф?»
Выбуховая драма з Элізабэт Тэйлар і Рычардам Бэртанам паводле п'есы Эдварда Олбі.
ТВ, 16 красавіка, панядзелак
АНТ, 00.00
Хто баіцца Вірджыніі Вульф? (Who's Afraid of Virginia Woolf?)
ЗША, 1966, чорна-белы, 129 хв.
Рэжысэр: Майк Нікалс
Ролі выконваюць: Элізабэт Тэйлар, Рычард Бэртан, Джордж Сігел, Сэндзі Дэніс
Жанр: Драма паводле аднайменнай п’есы Эдварда Олбі
“Оскары” Элізабэт Тэйлар і Сэндзі Дэніс, як лепшым актрысам, прэміі “Оскар” за лепшую апэратарскую працу (Гаскел Ўэксьлер), працу мастака (Рычард Сылбэрт), дэкаратара (Джорджа Гопкінза), дызайнэра па касьцюмах (Айрын Шараф).
Вярнуўшыся пасьля вячэры ў коле ўнівэрсытэцкіх сяброў, ціхмяны прафэсар Джордж высьвятляе, што ягоная крыклівая жонка Марта запрасіла “на працяг бяседы” маладога навукоўца з супругай. Бяседа станецца бурнай, стоеныя крыўды вырвуцца на волю, а ноч станецца дэкарацыяй для сямейнага пекла…
Клясычная п’еса Эдварда Олбі, якая бязьлітасна агаляла “хатнія канфлікты”, служыла мэтафарай улады й старасьці-маладосьці, была люстэркам істэблішмэнту й выбухам любові-нянавісьці, – выклікала шок.
Карціна правакатара Майка Нікалса (“Выпускнік”, “Плоцевыя веды”) узмацніла жарсьці: на галоўныя ролі былі запрошаныя Элізабэт Тэйлар і Рычард Бэртан, якія былі мужам і жонкай і двойчы са скандаламі касавалі ўласныя шлюбы.
Дзякуючы рэжысэру, фільм не стаўся статычнай тэатральнай экранізацыяй. Зарука гэтаму й чорна-белыя апэратарскія чары Гаскела Ўэксьлера, мастацкае майстэрства Рычарда Сылбэрта, дэкаратара Джорджа Гопкінса й дызайнэра па касьцюмах Айрын Шараф.
А спасылка на Вірджынію Вульф – з улікам рэпутацыі пісьменьніцы – цалкам апраўданая.
Цяпер чытаюць
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі2525
Каментары