Ірландская дарожная паліцыя нарэшце знайшла злоснага парушальніка з імем Prawo Jazdy, на ліку якога было больш за пяцьдзесят дарожных парушэнняў і які ў дадатак хаваўся ад правасуддзя па пяцідзесяці розных адрасах.
Але, выкрыўшы зламысніка, ірландскія даішнікі досыць збянтэжыліся. І было з чаго! Дарожныя паліцыянты старанна запісвалі парушэнні на імя спадара датуль пакуль, відаць, больш чуйны да пальшчызны паліцыянт не заўважыў, што па-польску словы Право Язды азначаюць «правы кіроўцы».
Як гэта адбывалася? Ірландскія паліцэйскія, спыніўшы грамадзянаў Польшчы за парушэнне і ўзяўшы іх правы кіроўцы міжнароднага ўзору, надрукаваныя на французскай і польскай мовах, вельмі часта (а дакладней 50 разоў) рабілі выснову, што запісаныя ў правым верхнім куце дакументу словы Prawo Jazdy і ёсць імем парушальніка. Пасля гэтага паліцэйскі, занатаваўшы фальшывае імя ўпоравень з правільным адрасам парушальніка са спакойнай душой адпускай кіроўцу. Год таму ўправа ірландскай дарожнай паліцыі была нават вымушаная выдаць кожнаму паліцэйскаму памятку, што «Право Язды — зусім не імя».
Гісторыю адкрылі ірландскія журналісты, але прэс-сакратар дарожнай паліцыі адмовіўся ад каментарыяў.
З пачатку 90-х больш за 200 тысяч палякаў пераехалі настала ў Ірландыю ў эканамічную эміграцыю.
