Гомельскія чыгуначныя дызелі ўжо не могуць перасоўвацца самастойна. У чым прычына?
Дзіўную карціну сталі назіраць жыхары Гомельскай вобласці апошнім часам: саставы рэгіянальных дызель-цягнікоў цягнуць па маршруце дадатковыя лакаматывы. Гэта значыць, сваім ходам, як належыць, дызелі перасоўвацца ўжо не могуць. Чаму так, высветліў «Флагшток».
Гаворка ідзе пра дызель-цягнікі розных мадыфікацый серый ДР1 вытворчасці Рыжскага вагонабудаўнічага завода. У прыватнасці — гэта дызель-цягнік серыі ДР1Б, распрацаванай спецыяльна па замове Беларускай чыгункі.
Першыя такія дызель-цягнікі паступілі ў дэпо «Гомель» у 2006 годзе і першапачаткова абслугоўвалі маршрут з абласнога цэнтра да Мінска. Таксама дызель-цягнікі ДР1Б працавалі на прыгарадных і трансгранічных маршрутах (Гомель — Чарнігаў, Гомель — Шчорс, Гомель — Бранск), а затым сталі курсіраваць па маршруце Гомель — Калінкавічы — Гомель.
Адзін з такіх дызель-цягнікоў імянны — ДР1Б-505 атрымаў імя «Алена Чухнюк», быў прыпісаны да лакаматыўнага дэпо «Гомель» і вызначаны для курсіравання па маршруце Гомель — Магілёў і на іншых напрамках. Менавіта яго, у тым ліку, і сфатаграфавалі разам з дапаможным лакаматывам — свежае фота датавана 3 мая 2024 года.
Характэрна, што літаральна ў красавіку гэты дызель-цягнік праходзіў капрамонт на лакаматыўным дэпо «Ліда». Аднак і пасля гэтага рухацца сваім ходам ён не можа.
Па звестках «Флагштока», прычына — у няспраўных дызельных устаноўках вытворчасці расійскага прадпрыемства «Звезда», якімі былі абсталяваныя саставы, вырабленыя на Рыжскім заводзе.
«Акрамя высокай ступені зносу дызель-цягнікоў (асобныя цягнікі эксплуатуюцца звыш 40 гадоў), цяпер дадалася масавая праблема з няспраўнымі дызельнымі ўстаноўкамі вытворчасці ПАО «Звезда». Вялікая колькасць рыжскіх дызель-цягнікоў ДР1А і ДР1Б ужо не могуць самастойна рухацца па маршрутах і маюць патрэбу ў выкарыстанні дапаможнага лакаматыва», — пракаментавала сітуацыю «Флагштоку» крыніца.
Дакладная прычына праблемы з заменай рухавікоў невядомая. Суразмоўца «Флагштока» выказаў здагадку, што БЧ не можа закупіць новыя дызельныя ўстаноўкі ў пецярбургскага прадпрыемства, паколькі яно моцна падняло на іх цэны і вырабляе ў абмежаванай колькасці.
На канцавой станцыі цеплавоз даводзіцца перачэпліваць да галавы цягніка. У розных выпадках дызель-цягнікі цягнуць па маршруце магістральным або манеўровым цеплавозам, адпаведныя фота рэгулярна з'яўляюцца ў пабліку «Беларуская чыгунка | БЧ».
Цяпер чытаюць
Расіянін месяц лётаў па Беларусі на машыне так, што атрымаў больш за 20 штрафаў на круглую суму4
Расіянін месяц лётаў па Беларусі на машыне так, што атрымаў больш за 20 штрафаў на круглую суму
Магілёў, Віцебск і Гомель удалося далучыць да БССР толькі таму, што Масква такім чынам хацела спакусіць Заходнюю Беларусь — апублікаваныя дакументы6565
Каментары