У 1972 годзе брытанскія ўлады і ірландскі Касцёл замаўчалі ўдзел каталіцкага ксяндза ў крывавым замаху ў Паўночнай Ірландыі.
Апублікаваны рапарт праваабаронцы Эла Хатчынсана адгарнуў чарговую цёмную старонку аднаго з самых крывавых канфліктаў сучаснай Еўропы.
У канцы 1972, праз некалькі месяцаў пасля выбуху ў Клоды (31 ліпеня), у выніку якога загінула дзевяць пратэстоўцаў, дзяржсакратар Уільям Уайтлоў, які ў брытанскім урадзе прадстаўляў Паўночную Ірландыю, сустрэўся з прымасам Ірландыі, кардыналам Уільямам Конвэем і прадставіў яму доказы тэрарыстычнай дзейнасці паўночнаірландскага ксяндза Джэймса Чэсні. Брытанцы ведалі, што Чэсні быў адным з арганізатараў выбуху ў Клоды і чальцом структураў Ірландскай рэспубліканскай арміі (ІРА), якая імкнулася да аддзялення Паўночнай Ірландыі ад Вялікабрытаніі.
Бакі сышліся на тым, што ксяндза Чэсні перавядуць у ірландскую парафію ў Донегале. З дакументаў, сабраных Хатчынсанам, вынікае, што ініцыятарам пераводу быў кардынал. Такім самым чынам касцельныя ўлады хавалі факты педафіліі сярод святарства. У пачатку 1973 Чэсні быў вывезены за мяжу. Пазней журналісты падазравалі яго ўдзел у замаху, што сам ён адмаўляў, а паліцыя ніколі яго не дапытвала. Следства скончылася нічым, і перад судом ніхто не паўстаў.
З дакументаў вынікае, што неўзабаве пасля замаху следчыя атрымалі загад прыпыніць расследаванне.Улады асцерагаліся, што раскрыццё ролі ксяндза ў гэтай справе можа прывесці да яшчэ большага завастрэння канфлікту і нават да грамадзянскай вайны паміж каталікамі і пратэстантамі, узаемная нянавісць якіх у той час сягала апагею. Ліпень 1972 быў адным з самых крывавых месяцаў — за 30 дзён тады загінула больш за 100 чалавек, а за год — больш за 500.
Ксёндз памёр у 1980. Памерлі ўжо і астатнія ўдзельнікі канфідэнцыйных дамоваў, у тым ліку кардынал Конвэй. Засталіся толькі дакументы, што кідаюць цень на брытанскія ўлады, паліцыю і Касцёл. Крэўныя ахвяраў замаху ў Клоды падазраюць, што тагачасны прэм’
У панядзелак, 31 ліпеня 1972, каля 10 гадзінаў раніцы ў Клоды адзін за адным узарваліся тры аўтамабілі, прыпаркаваныя блізка каля галоўнай вуліцы горада. Ад выбуху загінула 9 чалавек, у тым ліку трое дзяцей, 30 было паранена. У гісторыі Вялікабрытаніі падзея атрымала назву «крывавага панядзелка», які стаў адказам ІРА на знакамітую «крывавую нядзелю» ў студзені 1972, калі брытанскія салдаты забілі 14 каталікоў — удзельнікаў мірнага маршу ў Дэры.
Цяперашні сакратар па справах Паўночнай Ірландыі Оўэн Патэрсан прынёс прабачэнні крэўным загінулых за прыпыненне следстваі за тое, што яны не змаглі дабіцца справядлівасці, тлумачачы гэта тым, што тагачасныя ўлады дзейнічалі ў вельмі складаных акалічнасцях.
Спачуванне выказаў таксама Касцёл. Але прымас Ірландыі, кардынал Шон Брэдзі, адпрэчыў удзел Касцёла ў хаванні ксяндза. «Дзеянні кардынала Конвэя не перашкодзілі арыштаваць і дапытаць айца Чэсні пасля 1973 года», — заявіў ён.
