Верталёт AS-355NP «Ecureuil». Фота gpk.gov.by

Малюнак www.eurocopter.ru

20 кастрычніка каля 15.45 у раёне вёскі Вілейты Пастаўскага раёна Віцебскай вобласці прыкладна ў кіламетры ад беларуска-літоўскай мяжы разбіўся верталёт Памежнага камітэта Беларусі, паведамляе БелаПАН.

На борце знаходзіліся два члена экіпажа і здымачная група Тэлерадыёвяшчальнай арганізацыі Саюзнай дзяржавы (ТРА «Саюз») — усяго пяць чалавек.

Загінулыя журналісты — Юлія Шатэрнік (28 год), Віталь Прачкоўскі (36), Сяргей Шамалаў (39), якія рабілі спецыяльны рэпартаж з мяжы.

Верталёт выконваў планавы палёт па ахове дзяржаўнай мяжы.

Па факце катастрофы створана спецыяльная камісія, на месца крушэння выехаў старшыня Дзяржаўнага памежнага камітэта Ігар Рачкоўскі, паведамляе БелТА. Паводле інфармацыі сведкаў, у момант крушэння быў бачны моцны дым. У раёне здарэння паветраную прастору патруляваў яшчэ адзін верталёт.

***

Відэаролік пра трэніровачныя палёты на новых французскіх верталётах, лета 2010 года.

Першы верталёт AS-355NP «Ecureuil» французскай кампаніі «Еўракоптэр» Памежны камітэт Беларусі набыў у чэрвені 2009 года. Цягам 2010 года Беларусь набыла яшчэ тры верталёты гэтай фірмы. «Французы» базуюцца ў асобным авіяцыйным атрадзе Памежнага камітэта ў Паставах. Гэтыя верталёты значна таннейшыя за аналагічныя расійскія варыянты, а расход паліва ў чатыры разы меншы, чым у Мі-8, якія таксама выкарыстоўваюцца беларускімі памежнікамі.

***

Верталёт AS-355NP «Ecureuil» французскай кампаніі «Еўракоптэр» аснашчаны 2 рухавікамі, дзякуючы чаму ён сертыфікаваны па катэгорыі А. Верталёты гэтай катэгорыі могуць працягваць набор вышыні і гарызантальны палёт нават у выпадку адмовы аднаго з рухавікоў. Серыфікацыя па катэгорыі А з’яўляецца абавязковай для палётаў над гарадмі ў краінах Еўропы, а таксама Расіі.

Дзякуючы наяўнасці двух рухавікоў і аўтапілота верталёт можа быць абсталяваны авіяёнікай для палётаў па правілах прыборнага палёта.

У пасажырскай кабіне могуць размясціцца ад 3 да 6 пасажыраў.

Тактыка-тэхнічныя характарыстыкі AS-355NP «Ecureuil»

Максімальная ўзлётная вага — 2,6 т

Сярэдні расход паліва — 182 кг/г

Далечыня палёту — 731 км

Максімальная хуткасць — 278 км/г

Максімальная вышыня палёту — 6100 м

Максімальная працягласць палёту — 4 г. 35 хв.

Даўжыня фюзеляжа —10,93 м

Вышыня фюзеляжа — 3,14 м

Шырыня фюзеляжа — 1,78 м

Дыяметр асноўнага шруба — 10,69 м

Дыяметр хваставога шруба — 1,86 м.

***

Катастрофы «Еўракоптараў»

Апошняя здарылася 3 месяцы таму ў Аўстраліі. Тады таксама загінулі журналісты.

Верталёты французкай кампаніі «Еўракоптэр» — адны з самых папулярных у свеце. Але гэта, на жаль, не ратуе іх ад катастрофаў.

22 кастрычніка 1996 у Вялікабрытаніі разбіўся AS355 Squirrel F1. У катастрофе загінулі 6 члавек, у тым ліку і віцэ-прэзідэнт футбольнага клуба «Чэлсі» Мэцью Хардынг. А 3 мая 2007 у катастрофе верталёта Twin Squirrel кампаніі «Еўракоптэр» загінуў спонсар «Чэлсі» Філіп Картэр. Разам з ім загінулі яго сын, сябар і пілот.

26 ліпеня 1998 у Вялікабрытаніі разбіўся верталёт хуткай дапамогі, які ляцеў па выкліку на ДТЗ. 3 чалавекі загінулі.

27 снежня 2007 у Прыморскім краі Расіі пацярпеў катастрофу верталёт АS-350В3. Загінулі пілот і пасажыр.

19 жніўня 2011 тры чалавекі загінулі ў выніку катастрофы верталёта AS-355F-2 у Аўстраліі. Двое з іх былі журналістамі радыявяшчальнай карпарацыі АВС.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?