Adam Hlobus

2005. Ziuhanaŭ i niezaležnaść

Stalica prybrałasia ŭ śviatočnyja ahni. Praspekt Niezaležnaści zichacić miryjadami roznakalarovych lampačak i škielcaŭ. Kudy ni zirni, paŭsiul «niezaležnaść» i «niezaležnaść». Navat u vitrynach butyku «Bronks» pobač z postmadernisckimi skulpturami visiać plakaty z zaklikami śviatkavać 3 lipienia Dzień Niezaležnaści Respubliki Biełarusi. Razhladajučy vitrynu, padumaŭ: «Prapahanda śviata Niezaležnaści nabyła ŭ Biełarusi amerykanskuju formu. Miascovyja mastaki-prapahandysty vielmi chutka z savieckich pierakinulisia ŭ amerykanskich, a treba było b vykarystoŭvać eŭrapiejskija standarty, jany bolš ścipłyja, ale nia mienš dziejsnyja. U saviecka-amerykanskaj prapahandzie zašmat čysta źniešnich efektaŭ». Nie paśpieŭ ja skončyć svaje razvahi, jak, advaročvajučysia ad vitryny, ledź nie nalacieŭ na Ziuhanava. Hałoŭny rasiejski kamunist šłepaŭ prosta na mianie. U stalična-śviatočnym zichacieńni Ziuhanaŭ hladzieŭsia blakła. Nia tak i daŭno, hadoŭ jakich tryccać tamu, partyja rasiejskich kamunistaŭ kiravała bolšaj pałovaju śvietu, a ciapier jaje kiraŭnik ścipła tepaje pa niezaležnym Miensku ŭ 11 viečara, siarod viasiołaj i abyjakavaj da palityki biełaruskaj moładzi. Vypadkovaja sustreča ź Ziuhanavym mianie paciešyła jašče i tym, što hałoŭny rasiejski kamuniaka rostam mienšy za mianie. Liślivaje telebačańnie (telebačańnie skroź liślivaje, telebačańnie — forma liślivaści) navučyłasia rabić z roznych atopkaŭ vialikich ludziej, a ŭ realnaści jany zusim nievialikija i niajarkija. Prynamsi, davoli blakłuju asobu Hienadzia Ziuhanava ja ŭbačyŭ na mienskim praspekcie Niezaležnaści, kala butyku «Bronks».

1.07.2005, 12:45

∎

1971. Kamisarava i Ermitaž

Mastactvavied Kira Kamisarava pracavała navukovym supracoŭnikam u Ermitažy, tamu, zrabiŭšy łasku, prapanavała mnie naviedać muzej u vychodny dzień, kali možna pahladzieć muzej u cišyni i spakoi. Ni turystaŭ, ni nahladalnikaŭ. Biaźludnyja zali, poŭnyja mastactva. Leanarda, Rafael, Rembrant… Raptam Kamisarava zavaročvaje ŭ anfilady z carska-rasiejskim barachłom. «Čamuści nichto nia lubić chadzić da ruskich ekspanataŭ», — aburajecca Kira Kamisarava, stojačy kala vaskovaj maski Piatra Pieršaha. «I ja nie lublu…» — «Čamu?» — «Piotar Pieršy syna svajho zabiŭ…» Moŭčki my viarnulisia ŭ zali z žyvapisam. Kira Jurjeŭna čamuści pakryŭdziłasia.

1.07.2005, 12:07

∎

1974. Michajłoŭski i «dvoječka»

Vykładčyk fizkultury Michajłoŭski lubiŭ paŭtarać «pastaŭlu dvoječku». Tak jon zaklikaŭ navučencaŭ da dyscypliny. «Dvoječak» Michajłoŭski nikomu nia staviŭ, dabradušny byŭ čałaviek. Navučency stavilisia da Michajłoŭskaha dobrazyčliva. Jany navat nie zaŭvažali, što «pastavić dvoječku» vykładčyk abiacaŭ tolki hareźlivym navučenkam. Michajłoŭski byŭ u tym pavažanym pieradpensijnym vieku, kali z usich varyjantaŭ niešta tam niekamu pastavić vybirajecca i stavicca butelka ź vinom.

26.06.2005, 12:43

∎

• 0
• 0
• 0
• 0
• 0
• 0
• 0
• 0