Tamu što kachajemsia!

Tandem Juščanka—Cimašenka zapuściŭ maštabnuju prapahandysckuju kampaniju «Kochajemosia». Lolik Uškin pierajšoŭ da palavych daśledavańniaŭ ukrainskaha seksu.

Prykładna hod tamu «maci haradoŭ ruskich» nahadvała stalicu z oruełaŭskaj Akijanii. Što ni kilametar, to biłbord, ź jakoha na ciabie łybicca Vialiki Brat u asobie Viktara Janukoviča. Praŭda, były ekspert pa kradziažy futravych šapak z publičnaj prybiralni ŭ Janakijevie nie nahadvaŭ, jak toj Vialiki Brat, što ty, čuvak, žyvieš u realici-šoŭ. Podpis na bihmordzie (hetak tady nazyvali biłbordy) prosta kanstatavaŭ — «Tamu»: na malunku Janukovič tamu, što patryjot, tamu, što razumnaja asoba…

Minuŭ hod, i moj lubimy horad znoŭ zatykany adnatypnymi biłbordami. Hetym razam fijaletavaha koleru z nadpisami: «Ukrainie patrebnyja kasmanaŭty. Kachajemsia!», «Ukrainie patrebnyja futbalisty. Kachajemsia!», «Ukrainie patrebnyja «Oskary». Kachajemsia!»…

Heta pieršaja maštabnaja kampanija ŭ halinie sacyjalnaj reklamy, jakuju inicyjavaŭ Juščankaŭ urad. Meta pavalnaha kachańnia — «ukraincaŭ pavinna być 52 miljony čałaviek». Zadača nie takaja ŭžo i valuntarystyčnaja: Cimašenka ŭźniała bonus za naradžeńnie dziciaci da niekalkich tysiač zialonych.

Adnak bolš prykolna toje, jak novaja kampanija adbiłasia na ŭkrainskim seksualnym dyskursie.

Siońnia luby seksualny podźvih abo zalacańnie treba razumieć jak akt lajalnaści režymu. Klasyčnaja schiema flirtu palityzujecca: «Maryčka, nu davaj!..» — «Dobra, adnak maj na ŭvazie: tolki tamu, što krainie nie chapaje kasmanaŭtaŭ». Jak vynik, usie ludzi sa zdarovym seksualnym tonusam u vačach hramadztva stanoviacca «aranžystami».

A što ž pradstaŭniki kamunistyčnaj i aliharchičnaj apazycyi? Naturalna, jak palityčnyja apanenty kiroŭnaj kaalicyi jany chacieli b, kab kampanija «Kachajemsia» hiknułasia. Inakš u vyniku demahrafičnaha rostu Juščanka i K° atrymajuć pijarnuju bombu dy zrobiać im na vybarach u sakaviku'2006 elektaralnuju Chirasimu. Ale jak kankretna pavinien vyhladać sabataž? Davodzić sa spasyłkaj na statystyku, što va Ŭkrainie niama stolki sała, kab prakarmić 52 miljony ratoŭ? Śmiešna.

Apazycyjaneram zastajecca adno — być vielmi aściarožnymi da prapanoŭ eratyčnaha charaktaru. «Maryčka, nu davaj!..» — «Raźbiehsia! A moža, ty aranžyst chrenaŭ? Idzi da Cimašenki». Hetakaja kalektyŭnaja aściarožnaja reakcyja apazycyjaneraŭ na seksualnyja prapanovy adrazu stvaraje im nehatyŭny imidž — fryhidnych asobaŭ dy impatentaŭ.

Jak bačym, manapalizacyja i indaktrynacyja seksualnaha žyćcia — sapraŭdy superchod aranžavaha palityčnaha pijaru. Cikava, ci impartujuć ajčynnyja palittechnolahi dośvied Ukrainy padčas kampanii 2006 hodu?

Prykolna było b ubačyć nastupnym hodam uzdoŭž praspektu biłbordy «Krainie nie chapaje miantoŭ. Kachajciesia!», «Krainie nie chapaje pieramožcaŭ «Dažynak». Kachajciesia!», «Krainie nie chapaje siabroŭ budaŭničych atradaŭ BRSM dla rekanstrukcyi Aŭhustoŭskaha kanała. Kachajciesia!». Nu a na BT zamiest rolika «Budź zdolnaja skazać «Nie» zapuścić trek «Zaŭsiody kažy «Tak!».

Ciažka prahnazavać vyniki takoj reklamy, adnak u lubym vypadku antyłukašystam treba nie tarmazić. Jak nakont nalepak z zaklikam «Biełarusi nie chapaje Skarynaŭ. Kachajciesia!»?

• 0
• 0
• 0
• 0
• 0
• 0
• 0
• 0