Jak minčuki stvaryli najbujniejšuju ŭ krainie fotastudyju na 60 załaŭ
Nadzieja Sałaŭjova razam z mužam vałodajuć tryma biznesami, siarod jakich — najbujniejšaja pa kolkaści załaŭ u SND prastora dla stvareńnia kantentu PhotoHub. Tut ładziać pryvatnyja fotasiesii, a taksama zdymajuć rekłamu i filmy. Nadzieja raspaviała MYFIN pra etapy stvareńnia fotachaba, składanaści i prablemy pradprymalnika.
Pajšła ŭ fotaškołu i zrazumieła, što Minsk pierapoŭnieny adnolkavymi studyjami
— Pra stvareńnie svajoj fotastudyi ja zadumałasia ŭ 2020 hodzie. U toj hod ja pajšła na kurs prafiesijnaj fatahrafii i pry vykanańni dypłomnaj pracy sutyknułasia z prablemaj: mnie nie ŭdałosia adšukać u Minsku fotastudyju, jakaja mahła b zakryć maje patreby.
Na toj momant u Nadziei z mužam užo byli dziejnyja biznesy — sietka dziciačych zabaŭlalnych centraŭ Las Legas i Muziej Lego. A ciapier źjaviłasia razumieńnie, što možna raźvivać jašče adzin kirunak.
— Placovak dla fota ŭ horadzie ŭžo na toj momant było šmat, ale amal usie jany vyhladali adnolkava. Ja hladzieła studyi i łaviła siabie na dumcy: možna zrabić lepš. My z mužam vyrašyli, što Minsk zasłuhoŭvaje kłasnaj prastory z vysokim uzroŭniem servisu i vialikim vybaram. Ja skazała vykładčyku, što adkryju svaju sietku studyj. Jon tady nie pavieryŭ.
Stali šukać pamiaškańnie: pačali hladzieć, što mienavita i za jakija hrošy prapanuje rynak.
Nadzieja vystaviła kryteryi: u pamiaškańni abaviazkova pavinny być vysokija stoli, inakš budzie składana źmiaścić śvietłavoje abstalavańnie. Placoŭka pavinna znachodzicca ŭ centry i mieć dobruju transpartnuju dastupnaść. Pad hetyja charaktarystyki padychodziła byłoje zavodskaje pamiaškańnie nasuprać CUMa. Tut u razhar pandemii Nadzieja z mužam i adkryli pieršyja 16 studyj.
— Kali my adkryvalisia ŭ 2021-m, u nas była ŭ arendzie pałova paviercha. Zaraz PhotoHub zajmaje siem pavierchaŭ, u nas 60 załaŭ.
Była tryvožnaść — ci ŭdasca znajści dastatkova klijentaŭ. Ale akazałasia, pandemija syhrała tolki na ruku, i na heta była pryčyna.
«Pakul inšyja studyi prapanoŭvali adnolkavy interjer z cykłaramaj, my adnavili biznes-zału»
Pry vybary interjeru pieršych studyj Nadzieja pamiatała: rynak pieranasyčany adnolkavaściu, a značyć, treba prapanoŭvać toje, čaho jašče niama.
— U kavidny čas biznes rezka pačaŭ sychodzić u anłajn, kampanii admaŭlalisia ad ofisaŭ, pieravodzili ludziej na «addalenuju pracu», zapuskali sacsietki, anłajn-pradukty, rekłamu. A značyć, patreba ŭ kantencie vyrasła ŭ razy. Dzie jaho zdymać? My zrabili staŭku na toje, što kampanijam patrebnyja prastory dla intervju, aficyjnych zdymkaŭ, prezientacyj.
Tamu adnu z załaŭ zrabili jak sapraŭdny ofis: stoł pieramoŭ, pracoŭnaje miesca, knihi, kresły. I jana akazałasia vielmi zapatrabavanaj:
— My dali mahčymaść ekśpiertam, u jakich niama ŭłasnaha ofisa, pryjści da nas i ŭ realistyčnych dekaracyjach zrabić kantent.
Zaraz u studyi dastatkova niezvyčajnych załaŭ: jość imitacyja školnaha kłasa (karystajecca popytam siarod školnikaŭ-vypusknikoŭ dla zdymki fotaalbomaŭ), miedycynski kabiniet (u im miedyki zdymajuć kantent dla sacsietak), jość mulaž francuzskaj bułačnaj, sučasnaj kuchni. Choć i zvykłych dla hetaha rynku załaŭ taksama chapaje.
Takaja vialikaja raznastajnaść, kaža Nadzieja, dapamahła pryciahnuć bujnych zakazčykaŭ — u tym liku tych, chto zajmajecca zdymkami kino:
— Pryjemna, kali dačka biehaje i kaža, što pa TNT ubačyła sieryjał, źniaty ŭ našych łakacyjach.
— U nas vialiki vybar załaŭ u adnym miescy, i bujnyja kampanii mohuć pryjechać da nas, za 1—2 dni pravieści ŭsie nieabchodnyja zdymki ŭ roznych łakacyjach i navat arendavać u nas miesca dla charčavańnia zdymačnaj hrupy.
Da słova, bujnyja zakazčyki — asnoŭnyja klijenty letam:
— U hetaha biznesu jość siezonnaść. Uletku pryvatnyja zdymki zvyčajna pieranosiacca na vulicu. Ale kali my majem spravu z bujnoj kampanijaj — jana nie moža zaležyć ad vuličnaha nadvorja, vuličnaha aśviatleńnia, bo sabranyja kamanda, abstalavańnie. Takim klijentam patrebnyja prafiesijnaje śviatło i prafiesijnyja łakacyi. To-bok toje, što jość u nas.
Pry vybary novaha dyzajnu studyi Nadzieja źbiraje zvarotnuju suviaź ad klijentaŭ — pytajecca, čaho mienavita im nie chapaje. Byvaje, klijenty prosiać peŭnuju zału, jaje stvarajuć — a jana nie karystajecca popytam. U takim vypadku robiać redyzajn.
«U nas biaskoncaja budoŭla»
Nadzieja źviartaje ŭvahu: jaje z mužam biznes na fotastudyjach zanadta ramantyzavany:
— Niekatoryja dumajuć, što ŭsia naša zadača — pryhoža rasstavić meblu. Nasamreč u nas biaskoncaja budoŭla, ramonty i vielizarnaja kolkaść techničnych prablem.
U studyjach niešta łamajecca nastolki časta, što ŭ štat uziali niekalki čałaviek, jakija adkazvajuć za techničnuju častku: pryklejać adarvany lištvu, źbiaruć meblu, papraviać abstalavańnie. Z-za taho, što pałomki zdarajucca ŭ tym liku pa vinie klijentaŭ, u kožnaj prastory ŭstalavanyja videakamiery.
— Časam ździŭlaje, nakolki niadbajna niekatoryja ludzi staviacca da čužoj majomaści. U nas z mužam byŭ vopyt zdačy siadziby ŭ arendu, i mnie zdavałasia, što mianie ničym nie ździvić. Ale byŭ vypadak z załaj «Karbon», dla jakoj my kuplali antykvarnuju meblu. Ja jeździła pa barachołkach, my šukali kresły, kanapy, potym ich ramantavali, pieraciahvali. I ŭjavicie: zała jašče novaja, u joj było niekalki zdymkaŭ, a ŭ kanapie — dzirki. My nie mahli zrazumieć, ad čaho jany źjavilisia. Hladzim zapis z kamier: akazałasia, madel na abcasach zalezła na kanapu ŭ abutku, na špilcy, i pazavała.
U PhotoHub jość zała ŭ vyhladzie choła hatela z resepšenam, na stale staić niezvyčajny śviacilnik sa šklanym płafonam:
— Ja ŭžo siomy raz kuplaju novy śviacilnik, jaho pastajanna bjuć. A bieź jaho niama takoha anturažu.
Kali klijent sapsavaŭ abstalavańnie abo rekvizit, jon pavinien pakryć straty — heta prapisana ŭ praviłach.
Što značyć «kłasny servis» u hetym biznesie?
Nadzieja padkreślivaje: joj važna było stvaryć u klijentaŭ adčuvańnie, što pra ich pakłapacilisia. Što heta značyć? Naprykład, u zonie čakańnia jość biaspłatnaja harbata i kava. U kožnaj zale — kandycyjanier, wi-fi.
Asobnaja historyja — lift: jaho nie było. Nadzieja vyrašyła, što treba ŭstalavać — tamu što ŭmoŭnamu vizažystu z valizkami kaśmietyki składana ciahnuć hetyja rečy na čaćviorty pavierch.
— Šachta tut užo była, ale lifta nie było, i arendadaŭca nie chacieŭ jaho stavić. Tut užo byŭ hruzavy lift, ale jon pracuje abmiežavany čas, začyniajecca na abied.
My pastavili lift sami, niedzie nam dali kampiensacyju ŭ košt arendy. Heta pytańnie nie tolki hrošaj, bo jašče byŭ doŭhi praces uzhadnieńnia.
Ramont tualetaŭ taksama zrabili za svaje hrošy — kab klijentam było kamfortna.
— My ŭkładajemsia ŭ servis. My pradajom nie arendu załaŭ, my pradajom uražańni, a taksama mahčymaść pryjści i ŭvasobić svaju ideju.
Chab patrabuje šmat układańniaŭ, pastajannaha ŭlivańnia hrošaj. Na dadzieny momant jon nie akuplajecca.
— Vy nie baiciesia, što ludzi zaraz vyrašać masava rabić ŠI-fotasiesii, i vy stracicie klijentaŭ? A jak vy staviciesia da ŠI-fatahrafii?
— Z ahidaj.
«Vialikaja pamyłka — ciahnuć usio samoj»
Nadzieja robić akcent, što za čas pracy ŭ chabie zrazumieła: jaje hałoŭnaja meta — znajści dobrych vykanaŭcaŭ, a nie zrabić usio samoj.
— Raniej ja dapuskała pamyłku, źviazanuju z adsutnaściu delehavańnia. Ja dapamahała farbavać ścieny, rabiła dekor, upryhožvała zały da Novaha hoda. U vyniku vyrašyła naniać kiraŭnika dla «apieracyjonki», a dla siabie pakinuła tolki toje, što mnie padabajecca. Ja zaviaršaju kožny etap padrychtoŭki novaj zały, rasstaŭlaju finalny dekor. Fota zały taksama rablu ja, tamu što mnie heta padabajecca. Ja dumała, što bieź mianie studyja razvalicca. Ale kali tvoj biznes pracuje tolki pry tvajoj prysutnaści, heta nie biźnies, heta chobi.
Ciapier čytajuć
Jak rychtavaŭsia vizit Cichanoŭskaj u Kijeŭ i čamu jon niekalki razoŭ pieranosiŭsia11
Kamientary
I ahułam niešta tut nie čysta. Siem pavierchaŭ, jakija nie akupajucca. Ź vialikimi vydatkami na meblu ramonty. Prytym isnuje piać hod. Nu nie možna heta isnavać jak biznes! Albo jany čyjeści svajaki, albo arandadaŭca čakaje, pakul jany jašče bolej załaŭ adramantujuć, kab potym pierazdać ich pad ofisy.