«Ja jedu natchnicca ŭkraincami». Śviatłana Cichanoŭskaja pačała aficyjny vizit va Ukrainu

Siońnia, 25 maja, Śviatłana Cichanoŭskaja pačała svoj pieršy aficyjny vizit va Ukrainu. U najbližejšyja dni na palach IV Mižnarodnaha samitu haradoŭ i rehijonaŭ u Kijevie jana płanuje sustrečy z kiraŭnictvam Ukrainy, vałanciorami i pradstaŭnikami biełaruskich arhanizacyj. U centry razmoŭ — supraca pamiž Ukrainaj i biełaruskimi demakratyčnymi siłami, biaśpieka rehijona, pahroza novaj eskałacyi i toje, jak nie dapuścić jašče bolšaha ŭciahvańnia Biełarusi ŭ vajnu.

Pavialičyć

U kamientary «Našaj Nivie» Śviatłana Cichanoŭskaja kaža: u Kijeŭ jana jedzie nie tolki z palityčnym paradkam dnia, ale jašče i z asabistym pačućciom udziačnaści i patrebaj «zaradzicca enierhijaj pieramohi».

— Ja jedu ź vielmi pazityŭnymi dumkami, — kaža Śviatłana Cichanoŭskaja. — Ja, kaniešnie, razumieju, što va Ukrainie vajna, i papiaredniaja noč, kali Rasieja abstralała Kijeŭ, nadaje bolš tryvohi. Ale razumiejučy, što Ukraina kožny dzień, kožnuju noč žyvie pad takimi atakami, ja jedu pierš za ŭsio, kab natchnicca. Natchnicca ŭkraincami, natchnicca ich siłaj voli, mocaj i stojkaściu. I kab zaradzicca hetaj enierhijaj pieramohi.

Pavodle jaje słoŭ, u adnosinach pamiž Kijevam i biełaruskimi demakratyčnymi siłami ciapier pačaŭsia novy etap.

— Ja jedu ź vialikaj padziakaj. Pierš za ŭsio za toje, što hety vizit adbyvajecca, i što staŭleńnie Ukrainy da biełaruskich demakratyčnych siłaŭ źmianiłasia ŭ lepšy bok. I ja ŭpeŭnienaja, što ŭkrainski bok razumieje: u nas supolny vorah, i nam treba abjadnoŭvać vysiłki, kab ź im zmahacca.

Śviatłana Cichanoŭskaja padkreślivaje: niahledziačy na toje, što biełaruskija demakratyčnyja siły siońnia «ludzi biez krainy», jany ŭsio roŭna mohuć być karysnymi Ukrainie.

— Nam jość što prapanavać. Heta našyja cudoŭnyja biełarusy, jakija mohuć dapamahać i infarmacyjna — sa zboram infarmacyi ŭnutry krainy. Našyja miedyja taksama pavinny supracoŭničać z ukrainskimi miedyjami, kab lepš adzin adnaho adčuvać, tłumačyć, što adbyvajecca ŭ našych krainach. I, kaniešnie, vypracavać ahulnaje bačańnie, ahulnuju stratehiju, jak nie dapuścić uciahvańnia Biełarusi ŭ vajnu. Bo my bačym, što adbyvajecca va Ukrainie: usio vyhladaje jak padrychtoŭka da eskałacyi.

Pavialičyć

Asobna Śviatłana Cichanoŭskaja adznačyła, što choča pačuć i ŭkrainskaje bačańnie roli biełarusaŭ u supraćstajańni Rasii.

— Nam vielmi važna razumieć, jak ukraincy bačać našu rolu. Bo biełarusy ŭsio roŭna praciahvajuć pracu — i infarmacyjnuju, i na miescach, choć i ŭ padpolli. I, moža, va ŭkraincaŭ jość bolš šyrokaje bačańnie, uličvajučy ich dośvied, jak supraćstajać vorahu.

Padčas vizitu Cichanoŭskaja taksama płanuje sustrecca ź biełarusami, jakija žyvuć va Ukrainie pad abstrełami, a taksama naviedać miescy pamiaci biełaruskich dobraachvotnikaŭ, jakija zahinuli ŭ vajnie suprać Rasii.

— Vielmi važny momant — sustrecca ź biełarusami, jakija, jak i ŭkraincy, žyvuć pad bambiožkami i vymušanyja pieraadolvać šerah biurakratyčnych prablem ź lehalizacyjaj. Našyja vałanciory, našyja dobraachvotniki taksama znachodziacca ŭ vielmi niapeŭnym stanie. I chaciełasia b naviedać važnyja miescy dla biełarusaŭ — mahiły našych zahinułych hierojaŭ, tych, chto zahinuŭ paśla pačatku poŭnamaštabnaj vajny, i ŭ 2014 hodzie. My nie pavinny zabyvać, što vajna pačałasia nie 24 lutaha 2022 hoda, a značna raniej.

Pavialičyć

Adnoj z hałoŭnych palityčnych zadač vizitu Cichanoŭskaja nazyvaje stvareńnie pastajannych miechanizmaŭ supracoŭnictva pamiž Ukrainaj i biełaruskimi demakratyčnymi strukturami.

— Kab vybudavać bolš davierlivuju i ščylnuju supracu z ukrainskim bokam, nam treba instytucyjanalizavać hetuju supracu. My b chacieli, kab była stvoranaja mižviedamasnaja hrupa, jakaja pracavała b mienavita pa Biełarusi. Spadziajusia, što budzie pryznačany śpiecpradstaŭnik pa Biełarusi. Misija demakratyčnych sił, spadziajusia, uvojdzie ŭ pastajannuju pracu. I vielmi važna, kab u hetaj supracy ŭdzielničali biełaruskija arhanizacyi va Ukrainie.

Pavialičyć

Pavodle jaje słoŭ, za apošnija hady pamiž častkaj biełaruskich struktur i ŭkrainskim bokam nazapasiłasia šmat uzajemnaha niedahavorvańnia, u tym liku tamu, što ludziam prosta nie chapała asabistaj kamunikacyi.

— Chočacca jednaści. Ja razumieju, što jość roznyja mierkavańni, u tym liku nakont Ofisa. Prosta ludzi mała kamunikavali pamiž saboj. Kali ty pracuješ va Ukrainie, dzie idzie vajna, dzie ludzi žyvuć pad bambiožkami, časam moža zdavacca, što na palityčnym uzroŭni ničoha nie robicca. Ale heta nie tak. I našaja zadača — pabačyć i pačuć adzin adnaho. Bo pakul ty nie abdymieš čałavieka, nie pabačyš jaho, nie adčuješ — heta taksama moža pieraškadžać bolš ščylnaj kamunikacyi.

U hrafiku Cichanoŭskaj — taksama sustrečy ź biełaruskimi vajarami, u tym liku z pradstaŭnikami pałka Kalinoŭskaha.

— Z našymi dziejučymi vajarami, z pałka Kastusia Kalinoŭskaha i inšych padraździaleńniaŭ taksama chaču sustrecca, kab adčuć ich. Vielmi ščylny hrafik u nas na hety vizit. Ale kali pieršy aficyjny vizit adbudziecca, to potym užo možna budzie jeździć čaściej. Mnie vielmi chaciełasia b naviedać i inšyja harady: Buču, Charkaŭ, Adesu. Dźviery dla nas ciapier adčyniajucca. I heta, kaniešnie, vialikaje natchnieńnie dla biełarusaŭ u Biełarusi taksama.

Pavialičyć

Pra padrychtoŭku vizitu Śviatłany Cichanoŭskaj jašče 22 traŭnia paviedamiŭ ministr zamiežnych spraŭ Ukrainy Andrej Sibiha, faktyčna paćvierdziŭšy, što Kijeŭ hatovy vieści dyjałoh pa biełaruskim pytańni mienavita z demakratyčnymi siłami Biełarusi, a nie z režymam Alaksandra Łukašenki. 

Zajava Sibihi prahučała na fonie čarhovych słovaŭ Łukašenki pra hatoŭnaść sustrecca ź Zialenskim u Kijevie. Kijeŭ adreahavaŭ davoli žorstka. 

«U nas jość z kim razmaŭlać pa ŭsich pytańniach adnosna Biełarusi», — skazaŭ kiraŭnik ukrainskaha MZS, anansujučy pryjezd Cichanoŭskaj. 

Detali prahramy vizitu pakul nie raskryvajucca ź mierkavańniaŭ biaśpieki. 

Pavialičyć

Apošnija tydni pamiž ofisam Cichanoŭskaj i ŭkrainskim kiraŭnictvam adbyvaŭsia i publičny kantakt. Paśla masiravanych rasijskich udaraŭ pa Kijevie Cichanoŭskaja vykazała padtrymku Ukrainie, a Uładzimir Zialenski padziakavaŭ joj za salidarnaść. 

Pavialičyć

Pavialičyć

Pavialičyć

Pavialičyć

Dla Cichanoŭskaj heta budzie pieršy vizit va Ukrainu paśla doŭhaha pieryjadu chałodnych i aściarožnych adnosinaŭ pamiž Kijevam i biełaruskimi demakratyčnymi siłami paśla pačatku poŭnamaštabnaj vajny. Ciapier ža ŭkrainskija ŭłady ŭsio bolš adkryta padkreślivajuć, što razhladajuć Biełaruś jak krainu, jakaja ŭ budučyni moža viarnucca ŭ jeŭrapiejskuju prastoru. 

• 46
• 1
• 1
• 3
• 0
• 0
• 0
• 4