Miniust admoviŭ u rehistracyi "Ruchu "Za Svabodu".
Ministerstva justycyi Biełarusi admoviła ŭ rehistracyi respublikanskaha hramadskaha abjadnańnia (RHA) "Ruch "Za svabodu".
Jak paviedamiŭ BiełaPAN adzin z suzasnavalnikaŭ arhanizacyi Alaksiej Kavalec, aficyjny adkaz ź Miniusta jon atrymaŭ 21 lipienia. U dakumiencie ŭtrymlivajucca pretenzii da farmuloŭki statuta RHA. Pavodle słoŭ A.Kavalca, pretenzii hetyja "absalutna nie abhruntavanyja i sami sabie supiarečać". Adkaz Miniusta - jašče adno paćviardžeńnie tamu, što "režym i nie źbirajecca iści ni na jakija sastupki, ni na jakuju libieralizacyju", ličyć suzasnavalnik abjadnańnia.
A.Kavalec paviedamiŭ, što jurysty ŭžo pačali vyvučać adkaz čynoŭnikaŭ, i nieŭzabavie buduć akreśleny dalejšyja dziejańni arhkamiteta pa stvareńni ruchu "Za svabodu". Nie vyklučana, što dziejańni Miniusta buduć abskardžanyja ŭ sudovym paradku.
Nahadajem, što ŭstanoŭčy schod RHA "Ruch "Za svabodu" adbyŭsia ŭ Hrodnie 20 maja. Siarod hałoŭnych kirunkaŭ dziejnaści arhanizacyi - abarona pravoŭ čałavieka, pabudova hramadzianskaj supolnaści, zabieśpiačeńnie niezaležnaści i suvierenitetu, praviadzieńnie svabodnych i demakratyčnych vybaraŭ.
Dakumienty na rehistracyju abjadnańnia byli padadzienyja ŭ Miniust 18 červienia. Jak zajaviŭ tady žurnalistam lider RHA, eks-kandydat u prezidenty Biełarusi Alaksandr Milinkievič, rehistracyja ruchu "źjaŭlajecca adnym ź indykataraŭ demakratyzacyi siońniašniaha aŭtarytarnaha režymu". "Na takoj pazicyi stajać i jeŭrapiejskija palityki. Situacyja sa svabodaj asacyjacyj u našaj krainie za apošni čas značna pahoršyłasia. Za apošnija try hady było likvidavana bolš za 200 niedziaržaŭnych hramadskich abjadnańniaŭ i nie zarehistravana ni adnaho, jakoje nie było b pramym ci ŭskosnym čynam źviazana ź dziaržavaj", - zaznačyŭ A.Milinkievič.
BiełaPAN
Kamientary