Siońniašniaja industryja mody adychodzić ad standartaŭ biezdakornych układak na karyść naturalnaj, a časam i padkreślenaj niadbajnaści. Raniejšaja prykmieta stomlenaści pieratvaryłasia ŭ manifiest upeŭnienaści i dystancyjavańnia ad štučnaj daskanałaści sacsietak.
Na apošnich pakazach takich modnych damoŭ, jak Prada, Simone Rocha i Coach, hledačy mahli zaŭvažyć niezvyčajnuju tendencyju: madeli vychodzili na podyum z naŭmysna nieachajnymi, navat krychu zbłytanymi vałasami. Zamiest idealna vykładzienych pryčosak jany demanstravali vałasy, jakija vyhladali tak, byccam ich ledź kranuli rasčoskaj.
U sacyjalnych sietkach hety trend užo atrymaŭ iraničnuju nazvu «depresiŭnaja pryčoska», adnak, jak śćviardžaje The New York Times, dla industryi heta nie prosta vypadkovy vobraz, a adlustravańnie nastrojaŭ, jakija daŭno vyśpiavali ŭ hramadstvie.
Styl «niamytych vałasoŭ» i zabłytanych pasmaŭ aktyŭna prasoŭvajecca praz pop-kulturu, ad vobraza śpiavački Charli XCX da źjaŭleńnia aktrys Rejčeł Ziehler i Hviendalin Kryści na Met Gala z naŭmysna nierasčasanymi vałasami.
Dla mnohich dyzajnieraŭ takaja estetyka — sposab zrabić składanyja i jarkija vobrazy bolš naturalnymi. Zasnavalnica i kreatyŭnaja dyrektarka brenda Collina Strada Chiłary Tejmar (Hillary Taymour) raspaviadaje, što ŭ jaje vosieńskaj kalekcyi 2026 hoda, dzie vykarystoŭvalisia karunki, aborki i žyviolnyja prynty, naŭmysna nieachajnyja vałasy dapamahali źmiakčyć ahulnaje ŭražańnie. Pavodle jaje słoŭ, kali adzieńnie ŭžo pryciahvaje šmat uvahi, zanadta staranna zroblenaja pryčoska moža vyhladać praźmierna.
Pry hetym klučavuju rolu adyhryvaje maniera trymacca: taki vobraz budzie pierakanaŭčym tolki tady, kali čałaviek vyhladaje tak, niby zusim nie zadumvajecca pra ŭłasny vyhlad. Kreatyŭny dyrektar brenda Attersee Izabel Uiłkinsan Šor (Isabel Wilkinson Schor) adznačaje, što papularnaść takich pryčosak źviazanaja z žadańniem paźbiehnuć praźmiernaj daskanałaści i pakinuć miesca dla lohkaj nieachajnaści, jakaja vyhladaje naturalniej i žyviej.
Zrešty, sama dumka, što zanadta staracca dziela biezdakornaha vyhladu — nie nadta modnaja, zusim nie novaja. U 1990‑ia hady jana lažała ŭ asnovie estetyki hrandžu. Tady niamytyja vałasy i padranaje adzieńnie stali svojeasablivaj reakcyjaj na papiaredniuju epochu, kali moda była apantanaja łahatypami, raskošaj i biezdakornym vyhladam.
Siońniašni zvarot da nieachajnaści možna ličyć reakcyjaj na kult «łuksmaksinhu» (imknieńnia da maksimalnaj vizualnaj pryvabnaści) i vykarystańnie idealizavanych filtraŭ u sacyjalnych sietkach.
Viadomy stylist Hvida Pałau (Guido Palau), jaki pracavaŭ nad pryčoskami dla pakazu Prada, ličyć, što takaja nieachajnaść u fryzury maje jašče adno značeńnie. Na jahonuju dumku, jana dazvalaje pakinuć prastoru dla interpretacyi i nie demanstravać status zanadta adkryta. Kali čałaviek nosić darahi kašamiravy śvitar, jon moža chacieć, kab heta zaŭvažyli, ale nie adrazu. Pałau nazyvaje taki padychod «pieraviernutym snabizmam». Prykładna hetak ža pracuje i fryzura, jakaja vyhladaje vypadkovaj, choć nasamreč dobra pradumanaja.
Takim čynam, novaja moda na niepryčasanyja vałasy — nie pra lanotu i nie pra admovu ad dahladu. Chutčej, heta sproba adyści ad kultu biezdakornaha vyhladu i pakazać, što nie ŭsio pavinna być idealnym. U śviecie, dzie ludzi ŭsio čaściej imknucca vyhladać biezdakorna, lohka ŭskudłačanyja vałasy raptam stali prykmietaj upeŭnienaści ŭ sabie.
Ciapier čytajuć
Što viadoma pra žančynu, jakaja zahinuła ŭ aŭtobusie, što vioz biełaruskich futbalistaŭ-školnikaŭ u Hielendžyk?14
Što viadoma pra žančynu, jakaja zahinuła ŭ aŭtobusie, što vioz biełaruskich futbalistaŭ-školnikaŭ u Hielendžyk?
Cichanoŭskaja pra ŭdar pa aŭtobusie ź biełaruskimi dziećmi: Nie ryzykujcie žyćciom — nie jedźcie ŭ Rasiju, jakaja viadzie złačynnuju i niespraviadlivuju vajnu2121
Kamientary