Układčykam z Rasii ŭ kiprskich bankach naležyć 18,3 młrd dalaraŭ, kolki biełarusam — nieviadoma.
Usuška bankaŭskich układaŭ była ŭmovaj akazańnia krainie dapamohi Jeŭrasajuza. Kipr paciarpieŭ u vyniku kryzisu ŭ Hrecyi i vymušany byŭ źviarnucca pa dapamohu da MVF i ES. Spačatku havorka išła pra 17 młrd jeŭra, ale kredytory ŭrešcie pahadzilisia na 10 młrd, pry ŭmovie, što reštu srodkaŭ znojduć unutry krainy. Z hetaha i ŭźnikła havorka pra abrazańnie ŭsich vialikich depazitaŭ i padvyšeńnie padatkaŭ.
Infarmacyju pra heta trymali ŭ tajamnicy, abvieścili napiaredadni ŭviadzieńnia ekstranych zachadaŭ.
U pryvatnaści, uvodzicca adnakratny padatak na depazity ŭ bankach krainy. Jon moža być užyty adrazu paśla adkryćcia kredytnych instytutaŭ paśla vychadnych. Paniadziełak na Kipry — niepracoŭny dzień. Takim čynam, užo ŭ aŭtorak z depazitaŭ, bolšych za 100 tysiač jeŭra, śpišuć 9,9%, ź mienšych za 100 tysiač --6.75%. Takaja była ŭmova dapamohi ad Jeŭrasajuza i MVF. Źniać hrošy praz elektronnyja sistemy ŭ dadzieny momant praktyčna niemahčyma.
Kipr byŭ cichaj havańniu dla bahatyroŭ z Rasii i Uschodniaj Jeŭropy, jakija sychodzili ad padatkaŭ na radzimie.
Viadoma, što ŭkładčykam z Rasii ŭ kiprskich bankach naležać depazity na $18,3 młrd. Jany straciać kala $1,5 młrd za adzin dzień. Hrošy na papaŭnieńnie biudžetu atrymajuć i z afšornych kampanij. Karparatyŭny padatak pavyšany da 12,5%.
Raniej, kali ŭłady ES abmiarkoŭvali častkovaje śpisańnie srodkaŭ na depazitach u bankach Kipra, ekśpierty ličyli, što heta byŭ elemient cisku na Rasiju dla jaje ŭklučeńnia ŭ praces dapamohi krainie.
Kamientary